上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
祭司麥基洗德
7:1 此位麥基洗德是撒冷王，嘛是至高上帝的祭司。亞伯拉罕刣死許個王轉來的時，麥基洗德有給伊迎接閣給伊祝福。
7:2 亞伯拉罕有將伊所得著的十分一互伊。第一，麥基洗德此個名的意思是「正義的王」，伊閣是撒冷王，就是「和平王」。
7:3 伊無父無母，無世系，無出世的日子，嘛無性命的結束。伊及上帝的子仝款；伊繼續作祭司直到永遠。
7:4 恁看，此個人偌偉大！先祖亞伯拉罕都著將戰利品的十分一互伊。
7:5 有擔當祭司職的利未的子孫，雖然及其他以色列人民攏是亞伯拉罕的子孫，平平是兄弟，猶久奉命令照律法對人民收十分一。
7:6 麥基洗德毋是屬利未的世系，毋拘伊有對亞伯拉罕接受十分一，閣給得著上帝應允的亞伯拉罕祝福。
7:7 序細受序大祝福是理所當然。
7:8 一方面，諸個收十分一的攏是會死的人；另外一方面，彼位收十分一的，聖經有證實伊猶啲活。
7:9 按呢嘛通講，對人收十分一的利未已經通過亞伯拉罕對麥基洗德納十分一。
7:10 因為麥基洗德迎接亞伯拉罕的時，利未猶佇伊的先祖亞伯拉罕的身軀內。
7:11 以色列人的律法是根據利未的祭司制度頒發的，此個制度若會當互人完全，哪有需要毋是照亞倫的班次，是照麥基洗德班次設立的另外一個祭司？
7:12 既然祭司制度改變，律法嘛著改變。
7:13 因為諸個事所指彼位是屬別個支族；此個支族毋曾有人佇祭壇前侍奉。
7:14 咱的主明明是猶大支族的子孫；關係此個支族，摩西毋曾講起祭司的事。
另外一位親像麥基洗德的祭司
7:15 今，我啲講的代誌閣較清楚，因為有另外一位親像麥基洗德的祭司已經出現。
7:16 伊作祭司毋是根據人的條例規則，是根據𣍐毀滅的活命的權能。
7:17 因為聖經有按呢作證：
照麥基洗德的班次，
你永遠作祭司。
7:18 一方面，舊的條例因為無力，無路用，煞受廢無，
7:19 因為摩西的律法什麼代誌都無法度成全。另外一方面，有一個較好的向望已經準備好勢，互咱通通過此個向望親近上帝。
7:20 閣此個向望有經過宣誓。利未系統的祭司無經過宣誓；
7:21 只有此位耶穌作祭司的時有經過宣誓；伊的上帝對伊講：
主有宣誓，
𣍐改變心意；
你永遠作祭司。
7:22 就是因為按呢，耶穌成做閣較好的約的保證。
7:23 利未系統的祭司有真多，因為死的阻礙𪜶𣍐當繼續做；
7:24 只有耶穌毋免將祭司職交互別人，因為伊永遠活啲。
7:25 按呢，通過伊來到上帝面前的人，伊會當救𪜶到底，因為伊永遠活啲啲替𪜶祈禱。
7:26 此款大祭司抵抵合咱的需要；伊聖潔、無邪惡、無垃墋，對罪人中受分別出來，高升到比天較高。
7:27 伊無需要親像其他的大祭司逐日著先為著家己，後來為著人民的罪獻祭。伊獻本身做祭物，一遍就完成。
7:28 摩西的律法任命無完全的人作大祭司；毋拘有律法以後，上帝用宣誓任命伊的子永遠作完全的大祭司。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。