上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
提摩太前書
請安
1:1 我是保羅，照咱的救主上帝及做咱向望的基督耶穌的命令，我作基督耶穌的使徒，
1:2 寫批互提摩太，信仰上我真的子。願父上帝及咱的主基督耶穌賜你恩典、憐憫，及平安！
譴責錯誤的教義
1:3 我欲去馬其頓的時，有勸你著留佇以弗所，通命令一寡人毋通傳別款教義，
1:4 嘛毋通浪費精神佇無影跡的傳說及躼躼長的族譜，因為諸個只有會引起辯論，𣍐幫贊人用信了解上帝的計劃。
1:5 此個命令的目的是欲得著仁愛；此個仁愛是對清氣的心、清白的良心，及純真的信產生的。
1:6 有人對諸個偏離，失迷佇空虛的談論。
1:7 𪜶連家己所講所主張的都無理解，閣想欲作律法教師。
1:8 咱知，人若正確使用律法，律法是好。
1:9 咱嘛知，律法的制定毋是為著正直的人，是為著不法及無順服，無敬虔及犯罪，無聖潔及貪戀世俗，刣死父母及刣死人，
1:10 淫亂，好男色，拐誘人，講白賊，作偽證，抑是違反健全的教義此類的人。
1:11 此個健全的教義符合應該得著稱讚的上帝所交託我彼個榮光的福音。
感謝上帝的憐憫
1:12 我感謝互我氣力的咱的主基督耶穌，因為伊看我做通信任，指派我做差用。
1:13 雖然以前我謗瀆，迫害，閣給伊侮辱，猶久得著憐憫，是因為我猶未信毋識的時才按呢做。
1:14 咱的主賜我豐盛到滿出來的恩典，互我得著及基督耶穌結連才有的信及疼。
1:15 「基督耶穌臨到世間是欲拯救罪人」此句話通相信，值得完全接受。罪人中我是第一歹的。
1:16 毋拘我得著憐憫是因為耶穌基督欲用我此個第一歹的人來顯明伊無限的耐心，通做後來信耶穌來得著永活的人的模樣。
1:17 願尊貴、榮光歸佇萬世的君王，永遠存在、看𣍐著、獨一無二的上帝，直到永永遠遠。阿們！
1:18 我的子提摩太啊，照以前關係你所講的預言，我將此個命令交託你，互你通用諸個預言去爭戰應該贏的戰爭。
1:19 你著持守信心及清白的良心。有一寡人放拺良心，致到信心親像船擱淺，
1:20 其中有舒米乃及亞歷山大；我已經將𪜶交互撒旦，互𪜶受教示無閣謗瀆上帝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。