上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
腓立比書
保羅的勸勉
4:1 所以，我所親愛所數念的兄弟姊妹，恁是我的歡喜，我的榮光，著倚靠主來徛在。
4:2 我苦勸友阿蝶，嘛苦勸循都基，恁佇主的內面著同心。
4:3 我忠實的同伴啊，我嘛愛你幫贊此兩個婦仁人，因為𪜶及革利免以及我其他的同工曾為著福音及我做夥奮鬥；𪜶的名已經有記載佇活命冊。
4:4 著時常及主結連來歡喜！我閣講一遍，著歡喜！
4:5 著互眾人看會出恁的寬容。主啲欲來啦。
4:6 攏毋通掛慮什麼。萬事著用感謝的心祈求及代禱，將恁所求的互上帝知。
4:7 按呢，上帝所賜超越人一切了解的平安，會通過基督耶穌保守恁的心思意念。
4:8 兄弟姊妹，總講一句，許個會建立好德行的事，許個值得稱讚的事，就是一切真實的、一切通尊敬的、一切公正的、一切純潔的、一切可愛的、一切通謳咾的，諸個恁攏著不時囥佇心內。
4:9 恁對我所學習閣接受的、聽著閣看著的，諸個攏著繼續實行。按呢，賜平安的上帝就會及恁同在。
感謝腓立比信徒的禮物
4:10 我佇主的內面非常歡喜！因為過一段時間了後，恁對我的關心有閣茁芛開花；其實，恁有啲給我關心，不過是無機會通表示若定。
4:11 毋是講我無夠用，因為我已經學會曉無論佇什麼境遇攏知足。
4:12 我知按怎過散赤的生活，嘛知按怎過富裕的生活。是飽抑是枵，是有賰抑是欠缺，我已經得著祕訣，就是無論什麼時陣什麼所在，我攏知足。
4:13 倚靠賜我能力的基督，我有氣力通克服逐款的境遇。
4:14 毋拘，恁有分擔我的困難，按呢實在真好。
4:15 恁腓立比人家己嘛攏知，佇我傳福音的初期，我離開馬其頓的時，只有恁的教會有分擔我的生活費用。
4:16 連我佇帖撒羅尼迦的時，恁有幾若遍送物件來供給我的需要。
4:17 我毋是愛恁送物件，是愛恁有較多的利純記入去恁的戶頭。
4:18 這是恁互我所有物件的收據。恁互我的已經夠額閣有賰。我有對以巴弗提收著恁送互我的禮物，親像發出芳味，上帝所接納歡喜的祭物。
4:19 我的上帝會照伊榮耀的豐富，通過基督耶穌來滿足恁所有的需要。
4:20 願榮光歸互咱的父上帝，直到永永遠遠。阿們！
最後的請安
4:21 請替我給屬基督耶穌的所有信徒請安。及我佇遮的兄弟姊妹嘛欲給恁請安。
4:22 佇遮所有的信徒，特別是凱撒王宮內的信徒，攏欲給恁請安。
4:23 願主耶穌基督的恩典及恁大家同在！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。