上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
腓立比書
真正的義
3:1 最後，兄弟姊妹，恁著靠主來歡喜！我閣講起以前所寫的，對我並無麻煩，對恁卻有幫贊。
3:2 著注意彼陣狗，注意許個作歹的人，注意許個家己割傷身軀的人。
3:3 其實，咱才是真正受割禮的人。咱通過聖神敬拜上帝，誇口基督耶穌，無倚靠外表的禮儀。
3:4 若講欲倚靠禮儀，我嘛會；若有人想講伊會當倚靠禮儀，我閣較會。
3:5 我出世第八日就受割禮，是以色列人，屬便雅憫支族，是純粹的希伯來人。對守律法來講，我屬法利賽派；
3:6 對熱心來講，我是教會的迫害者；對守律法來成做義的標準來講，我攏無什麼通嫌。
3:7 毋拘，以前對我有利的，現在因為基督的緣故，我給伊看做損失。
3:8 毋若按呢，我真正看一切做損失，因為我看認識我的主基督耶穌做上寶貝。為著伊我放拺一切，看萬事做糞埽，是欲得著基督，
3:9 完全及伊結連，無閣有彼款靠家己守律法來得著的義。我現在有的義是通過信靠基督，是根據信來得著上帝所賞賜的義。
3:10 我所愛的是認識基督閣體驗伊閣活的大能力，及伊做夥受苦，經驗伊的死，
3:11 向望家己嘛會當對死閣活。
向目標直直走
3:12 按呢，毋是講我已經得著抑是已經達到目標；我繼續直直走，向望通得著賞；其實基督耶穌已經得著我。
3:13 兄弟姊妹，我無想講家己已經得著。我只有專心一項，就是𣍐記得後面的事，拍拼追求頭前的事，
3:14 向目標直直走，為著欲得著賞，就是上帝通過基督耶穌召我去領受彼個對頂面來的活命。
3:15 所以，咱中間成熟的人著有像款的想法。恁中間若有別款的想法，上帝嘛會將此個想法給恁指示。
3:16 無論按怎，咱著照已經走過來的路線繼續前進。
3:17 兄弟姊妹，恁攏著學我；著注意看許個隨阮的模樣的人按怎啲生活。
3:18 我已經有給恁講真多遍，現在閣流目屎給恁講：有真多人，𪜶的行為互𪜶成做基督十字架的對敵。
3:19 𪜶的結局是滅亡；𪜶用腹肚做神明；𪜶將見笑看做光榮；𪜶只有關心地上的事。
3:20 毋拘，咱是天頂的公民，熱切啲聽候對遐來的救世主，就是主耶穌基督。
3:21 伊會用互萬有屈服的能力來改變咱卑賤的體，互咱變做及伊像款榮耀的體。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。