上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以弗所書
5:1 既然恁是上帝所疼的子兒，著學伊。
5:2 言行舉止著有疼心，親像基督疼咱，為著咱犧牲家己的性命做芳芳的祭物獻互上帝。
5:3 既然恁是上帝的子民，一切淫亂、污穢，抑是貪慾的事，佇恁中間連講都毋通。
5:4 嘛毋通講邪淫、粗俗，抑是下流的話，反轉著感謝。
5:5 著確實知，淫亂、污穢、貪戀的人 — 貪戀是一種的拜偶像 — 基督及上帝的國絕對無𪜶的份。
佇光明中生活
5:6 毋通互人用空洞的話給恁迷去；上帝的受氣會為著諸個代誌臨到許個背逆的人。
5:7 所以，毋通及彼款人交插。
5:8 恁以前佇烏暗中，毋拘現在已經成做屬主的人佇光明中，行做著有光明子兒的款式；
5:9 光明所結的果子是逐款的良善、公義，及真理。
5:10 著查出什麼是主所歡喜的事。
5:11 毋通參與佇烏暗中啲做無路用的代誌，顛倒著給𪜶暴露出來。
5:12 𪜶掩掩蓋蓋啲做的，連講都見笑！
5:13 一切互光暴露就顯明出來，
5:14 因為給一切顯明出來的是光。所以有一句話按呢講：
啲睏的人，起來；
著對死人中𬦰起來！
基督欲給你照光！
5:15 所以，恁的行為著謹慎，毋通做無智慧的人，著做聰明的人，
5:16 善用機會，因為現今的時代邪惡。
5:17 所以，毋通做糊塗的人，著明白什麼是主的旨意。
5:18 毋通酒醉；酒醉會互恁敗壞；反轉著互聖神充滿。
5:19 著用詩篇、聖詩、靈歌對唱，對心底唱聖詩及詩篇稱讚主。
5:20 著靠咱的主耶穌基督的名，為著逐項代誌時常感謝天父上帝。
夫妻的關係
5:21 恁著用敬畏基督的心互相順服。
5:22 作婦仁人的，著親像順服主按呢順服丈夫。
5:23 因為丈夫是婦仁人的頭，親像基督是教會的頭；伊本身是教會 — 伊的身軀的救主。
5:24 親像教會順服基督，作婦仁人的應該嘛著事事順服丈夫。
5:25 作丈夫的，著疼婦仁人，親像基督疼教會，為著教會犧牲家己。
5:26 伊按呢做是欲通過伊的話用水洗清氣來聖化教會歸上帝，
5:27 互教會有榮光，攏無污點，無皺紋，抑是其他此款的缺點，成做聖潔無瑕疵通獻互家己。
5:28 像款，丈夫著疼家己的婦仁人，親像疼家己的身軀。疼婦仁人就是疼家己。
5:29 無人怨恨家己的身軀，顛倒是給伊保養，照顧，及基督對待教會仝款，
5:30 因為咱是伊身軀的肢體。
5:31 聖經講：「因為按呢，人會離開父母，及伊的某結合，兩人成做一體。」
5:32 此個經文啟示一個極大的奧祕；照我的理解，這是啲指基督及教會的關係。
5:33 總是，這嘛適用佇恁逐個人：丈夫著疼家己的婦仁人，親像疼家己；婦仁人著敬重伊的丈夫。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。