上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以弗所書
教會的合一
4:1 所以，做一個為著主作囚犯的人，我苦勸恁。既然恁受上帝呼召，行為著符合伊的呼召。
4:2 凡事著謙卑、溫柔、忍耐，用疼互相寬容，
4:3 用和平互相聯繫，盡力保持聖神所賜的合一。
4:4 身體只有一個；聖神只有一位；抵親像上帝召咱欲得著的向望是一個。
4:5 主只有一位；信仰只有一個；洗禮只有一個；
4:6 上帝只有一位，就是萬有的父，伊佇萬有的頂面，貫串萬有，閣佇萬有中。
4:7 咱逐個人攏照基督所賜的份量領受恩賜。
4:8 照聖經所講：
伊升高到上高的位的時，
帶一大隊受掠的及伊去，
賜恩賜互人。
4:9 「伊升高」此句話是什麼意思？就是：伊嘛曾降落到地下上深的所在。
4:10 按呢，「降落」彼位就是及「升高」到眾天的頂面來充滿萬有彼位是仝一位。
4:11 伊所賜的有使徒，有先知，有傳福音的，有牧養的及教導的。
4:12 伊按呢做是欲裝備上帝的子民通做侍奉的工作，來建立基督的體；
4:13 最後咱攏通對上帝的子有一致的信仰及認識來長大成人，達到基督完全的程度。
4:14 按呢，咱就無閣作囝仔，互欺騙者編造出來所有錯誤的學說拖啲行，飄來飄去。
4:15 咱反轉著用疼心講真實，佇逐方面用作頭的基督做目標來成長。
4:16 對伊，身體的逐筋節互相連接，相支持，逐個肢體發揮應該有的功能，互歸個身體長大，用疼建立起來。
佇基督作新人
4:17 所以，我奉主的名苦勸恁，毋通繼續親像外邦人按呢生活。𪜶因為無知及硬心，心思烏暗，致到思想空洞，及上帝所賜的活命隔斷。
4:18 併於上節
4:19 𪜶失去廉恥的心，盡情放縱做逐款污穢的代誌。
4:20 恁並毋是按呢學習基督。
4:21 恁應該有聽著伊的代誌，有對伊學習，因為佇耶穌才有真理。
4:22 按呢，著脫離以前的生活，褪去舊的人，因為舊的人受私慾的迷惑啲敗壞。
4:23 恁的心思意念著完全換新，
4:24 就是著穿照上帝的形像創造的新人，用根據真理所產生的公義及聖潔表現出來。
新的生活
4:25 所以，恁著脫離虛假，著對厝邊講真實話，因為咱攏是基督身體的一部份。
4:26 恁若受氣毋通致到犯罪。毋通到日落猶啲受氣；
4:27 毋通互魔鬼有孔縫通利用。
4:28 曾做賊的毋通閣偷提；著靠雙手出力做工得著正當的收入，有力通幫贊散赤人。
4:29 歹話攏毋通講；顛倒著講造就人的好話，互聽著的人得著利益。
4:30 毋通互上帝的聖神憂傷；因為聖神是恁屬上帝的印記，保證恁佇拯救的日得著解放。
4:31 著棄拺一切的惡毒、歹性地、受氣、喧嚷、誹謗，以及一切的歹。
4:32 著親切仁慈相款待，互相赦免，抵及上帝有通過基督赦免恁仝款。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。