上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
賠罪祭的條例
7:1 下面是賠罪祭的條例：
賠罪祭是至聖的。
7:2 著佇刣燒化祭的牲生的所在刣賠罪祭的牲生；給伊的血灑佇祭壇的四周圍。
7:3 伊的油著攏獻；歸支肥的尾、腹內及伊頂面的油、
7:4 兩粒腰子及𪜶邊仔的油，以及肝及伊的網紗著攏提起來。
7:5 祭司著將諸個下佇祭壇頂燒，做獻互上主的祭物。這是賠罪祭。
7:6 祭司家屬的查甫人攏通佇會幕的埕食祭肉；這是至聖的。
7:7 賠罪祭及贖罪祭的條例像款，祭物歸佇獻諸個祭的祭司。
7:8 仝款，燒化祭的牲生的皮歸佇獻燒化祭的祭司。
7:9 所有佇火爐烘的，佇鼎仔抑是煎盤煎的素祭，攏歸佇獻此個祭的祭司。
7:10 有抄油的，及無抄油的素祭，攏著歸亞倫的子孫，大家平分。
平安祭的條例
7:11 下面是獻互上主的平安祭的條例：
7:12 若有人為著感謝欲獻祭，著用抄油的無酵餅、抹油的無酵薄餅，及抄油的幼麵粉做的餅，及謝恩祭的牲生做夥獻。
7:13 閣著獻有酵的餅，及為著感謝獻的平安祭做夥獻。
7:14 著對逐項欲獻的餅提一份攑高做禮物獻互上主；諸個物著歸佇灑平安祭的血的祭司。
7:15 為著感謝獻的平安祭的肉，著佇獻祭彼日食，一點仔都毋通留到隔早起。
7:16 若有人為著謝願抑是甘心獻祭，獻的祭物著佇獻祭彼日食；賰的隔日猶通食，
7:17 毋拘賰的祭肉到第三日著燒掉。
7:18 若有人到第三日猶啲食平安祭的肉，伊獻的祭𣍐受上帝接納，嘛無算伊有獻此個祭；諸個肉無清氣，食的人著對家己的罪負責任。
7:19 祭肉若磕著無清氣的物，就毋通食，著用火燒掉。其他的祭肉，禮儀上清氣的人攏通食。
7:20 若有人本身無清氣，閣食獻互上主的平安祭的肉，此個人著對人民的中間革出。
7:21 若有人摸著無清氣的物，無論是無清氣的人，抑是無清氣的牲生，抑是任何無清氣的物，閣食著獻互上主的平安祭的肉，此個人著對人民中間革出。
7:22 上主命令摩西
7:23 著對以色列人宣布：
無論是牛、綿羊、山羊的油，攏毋通食。
7:24 自然死的牲生的油、互野獸拆裂的牲生的油，通做別項的路用，毋拘千萬毋通食。
7:25 無論什麼人食獻互上主用火燒的牲生的油，彼個人著對人民中間革出。
7:26 恁無論住佇什麼所在，攏毋通食鳥仔抑是野獸的血。
7:27 若有人食血，無論什麼血，彼個人著對人民中間革出。
7:28 上主命令摩西
7:29 著對以色列人宣布：
若有人欲獻平安祭互上主，著對伊的平安祭的祭物提一部份來獻。
7:30 伊著親手帶牲生的油及胸坎肉，用火燒做祭物獻互上主，將胸坎肉佇上主的面前搖搖咧做祭物獻互伊。
7:31 祭司著將油下佇祭壇頂燒；胸坎肉歸佇亞倫及伊的子孫。
7:32 恁著對恁的平安祭提正旁的大腿攑高做禮物，歸互祭司。
7:33 亞倫的子孫中間，獻平安祭的血及油的祭司，通得著此個正旁的大腿做𪜶的份額。
7:34 我對以色列人平安祭的中間，將此個搖過的胸坎肉及提高的正旁大腿，互祭司亞倫及伊的子孫，做𪜶對以色列人得著永遠的份額。
7:35 諸個祭肉是對用火燒獻互上主的祭物提出來，做亞倫及伊的子孫應得的份額，對𪜶做祭司服事上主的日開始。
7:36 這就是你給𪜶抹油設立彼日，上主命令欲互𪜶的份額，做以色列人世世代代永遠的規例。
7:37 以上是燒化祭、素祭、贖罪祭、賠罪祭、設立祭司的祭，及平安祭的條例。
7:38 諸個是摩西佇西奈的曠野吩咐以色列人獻祭物互上主的時，上主佇西奈山命令摩西的。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。