上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
加拉太書
4:1 我閣講，繼承人雖然是全部財產的所有者，伊佇未成年的時及奴隸無什麼差別，
4:2 一直到老父所定的日子，著受監護人及管家的監督。
4:3 咱嘛親像按呢，佇靈性未成年的時受宇宙間的神靈支配做奴隸。
4:4 毋拘時期到，上帝差家己的子，互伊對婦仁人來出世，活佇律法下，
4:5 為著欲救贖活佇律法下的人，通互上帝給咱收起來做子兒。
4:6 因為恁是上帝的子兒，伊有差伊的子的神入恁的心，互恁叫「阿爸，父！」
4:7 按呢，你無閣做奴隸，是子兒；既然是子兒，上帝就互你做繼承人。
保羅關懷加拉太人
4:8 以前，恁毋識上帝的時，做許個本質毋是真神的神明的奴隸，受𪜶支配。
4:9 毋拘現在恁已經識上帝，抑是講互上帝識，是按怎恁閣倒去尋許個無力閣無路用的神靈，做𪜶的奴隸？
4:10 恁守特別的日、月，及年仔節仔。
4:11 我驚了我為著恁所做的攏是白白做。
4:12 兄弟姊妹，因為我已經有成做親像恁，我懇求恁嘛著成做親像我。恁毋曾剋虧我。
4:13 恁會記得，我頭一遍傳福音互恁的時是因為我身軀有病。
4:14 雖然我健康的問題成做恁的重擔，恁都無看輕我，無拒絕我。恁顛倒接待我親像啲接待上帝的天使，親像啲接待基督耶穌。
4:15 恁當時的歡喜滿足哪煞無去？我敢講，恁當時若著給目睭挖出來互我嘛甘願。
4:16 現在，我對恁照實講煞變做恁的對敵！
4:17 許個人對恁熱情並毋是出佇好意，顛倒是想欲拆開恁及我的關係，互恁通對𪜶熱情。
4:18 好事毋是干焦我及恁做夥的時才做，著不時熱心去做。
4:19 我的細子，為著欲互恁有基督的款式，我閣一遍經過生子的痛苦。
4:20 我真愛此陣就去恁遐，通用無仝款的口氣及恁講話。我實在毋知欲按怎對待恁！
夏甲及莎拉的例
4:21 恁諸個愛互律法管轄的人，給我講，恁豈無欲聽律法啲講什麼？
4:22 因為律法有記載：亞伯拉罕有兩個子，一個是女婢生的，閣一個是自由的婦仁人生的。
4:23 女婢的子是通過人性生的；自由的婦仁人生的子是通過上帝的應允。
4:24 這通用下面的譬喻來說明：此兩個婦仁人代表兩種契約。一個是夏甲，代表西奈山的約，生的子作奴隸。
4:25 夏甲指阿拉伯的西奈山，代表現在的耶路撒冷；因為伊及伊的子孫攏是奴隸。
4:26 不過天頂的耶路撒冷是自由的，是咱的老母。
4:27 因為聖經有記載：
𣍐懷孕，𣍐生子的婦仁人啊，著歡喜！
毋曾經過生子痛苦的婦仁人啊，著大聲歡喜唱歌！
因為受放拺的婦仁人比有丈夫的閣較多子兒！
4:28 兄弟姊妹，恁親像以撒，是上帝應允的子兒。
4:29 當時，對人性生的迫害對上帝的神生的；現在嘛是按呢。
4:30 毋拘聖經按怎講？「著給女婢及伊的子趕出去，因為女婢的子𣍐當及自由的婦仁人的子平平繼承產業！」
4:31 所以，兄弟姊妹，咱毋是女婢的子兒，是自由的婦仁人的子兒。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。