上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多後書
保羅看見異象及啟示
12:1 我一定著展。雖然無利益，毋拘我欲講主互我的異象及啟示。
12:2 我知有一個信基督的人佇十四年前互主導到第三層天。我毋知伊的身軀有上去，抑是干焦看見異象，只有上帝知。
12:3 我知有一個人受導到樂園。伊的身軀有受接上去，抑是干焦看見異象，我毋知，只有上帝知。佇遐伊有聽見用話𣍐當表達，用嘴𣍐當講出的事。
12:4 併於上節
12:5 我欲展此個人；毋拘我的軟弱以外，我𣍐為著家己展。
12:6 其實，我若欲展，嘛𣍐算是悾憨，因為我欲講的是事實。毋拘我𣍐展家己，才免人對我的評價超過𪜶所看見所聽著的。
12:7 為著欲互我無因為有看見真多的啟示致到自高得意，佇我的身軀有一支刺，親像撒旦的使者啲給我苦楚，互我𣍐傷自高得意。
12:8 為著此項代誌，我曾三遍懇求主互彼支刺離開。
12:9 伊應我講：「我的恩典有夠通滿足你的需要；因為你軟弱的時，我的氣力才會當完全發揮。」因為按呢，我特別愛誇口我的軟弱，通互基督的氣力𫢶佇我身上。
12:10 為著基督的緣故，我給軟弱、侮辱、困苦、艱難，及迫害看做好，因為我什麼時軟弱，彼時就堅強。
保羅關心哥林多教會
12:11 我一直做戇人，是恁給我迫的；恁著給我褒獎才著。雖然我無受重視，嘛無較輸許個「超級使徒」。
12:12 我佇恁中間有用上大的耐心行神跡、奇事，及權能，證明我是使徒。
12:13 我無互恁機會幫贊我以外，我對待恁比對待其他的教會，有叨一項做較無夠？我此個「無公道」，請恁原諒。
12:14 今我第三遍準備欲去訪問恁。我𣍐成做恁的負擔；我𣍐要求恁什麼，因為我所愛的是恁，毋是恁的錢。應該是父母為著子兒，毋是子兒為著父母積聚財物。
12:15 我真歡喜為著恁付出我所有的，甚至連我本身都完全付出。豈講我疼恁愈多，得著恁的疼愈少？
12:16 有人講我詭計多端，用欺騙利用恁，我豈曾給恁拖累？
12:17 我豈有派什麼人去給恁偏？
12:18 我有勸提多去恁遐，閣派一個兄弟及伊做夥去。提多豈有偏恁？阮豈無仝心神啲做？豈無仝步調啲行？
12:19 恁一直想講阮對恁啲為著家己辯護是無？毋是！阮佇上帝面前講基督愛阮講的話。親愛的朋友，阮所做的攏是欲互恁得著造就。
12:20 我驚了去恁遐的時看著恁及我所期待的無相像；恁看著我及恁對我的期待嘛無仝款。我驚了恁有紛爭、怨妒、歹性地、自私、誹謗、講尻脊後話、驕傲、無秩序。
12:21 我驚了後遍閣去恁遐的時，我的上帝會互我佇恁面前見笑。我會為著真多人啼哭，因為𪜶對過去所犯的罪，就是污穢、淫亂、放蕩猶未悔改。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。