上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多後書
保羅為著工作辯護
10:1 人講我及恁見面的時客氣，及恁相離的時嚴轄，毋拘我此個保羅用基督的溫柔及仁慈親身苦勸恁。
10:2 我去恁遐的時毋通迫我對恁嚴轄；對許個批評講我用屬世的動機做代誌的人，我一定會對𪜶無客氣。
10:3 雖然阮𫢶世間啲生活，毋拘無照世間的方式啲爭戰。
10:4 我爭戰啲用的毋是屬世，是上帝有威力的武器，連堅固的要塞都會當破壞。阮推翻𪜶的言論，
10:5 將阻擋人認識上帝一切的驕傲攏給消滅，閣改變一切的意念，互伊完全歸順基督。
10:6 恁完全順服基督了後，阮就處罰逐個毋順服的人。
10:7 恁干焦啲看外表。若有人敢講伊屬基督，伊家己著閣想看覓，伊屬基督，我嘛仝款屬基督。
10:8 主互阮的權柄是欲給恁建立，毋是欲毀壞。我對此個權柄若有較誇口，我嘛無感覺見笑。
10:9 我無愛互恁想講我寫批啲給恁恐嚇。
10:10 因為有人講：「保羅的批嚴轄閣強硬，毋拘人來的時卻軟汫，講話無份量。」
10:11 講此款話的人著知，阮無佇恁遐的時批按怎寫，阮到恁遐的時嘛會按呢做。
10:12 阮毋敢及𠢕展家己的人排啲相比；𪜶按呢彼此秤重，互相比較，實在無智慧。
10:13 連佇恁中間的工作包含在內，阮的誇口攏佇上帝定的限度內，攏無超過。
10:14 阮無超過範圍，無去恁遐嘛講有去；其實，阮是頭一個將基督的福音傳互恁的。
10:15 阮並無超過限度，用別人所勞苦的做家己的成績來誇口。阮所向望的是恁的信心愈增長，阮佇恁中間工作的範圍嘛愈開闊。
10:16 按呢，阮才通將福音傳到恁以外的地區，無用別人佇𪜶的範圍的成就做誇口。
10:17 照聖經所講：「欲誇口的人，著誇口主！」
10:18 因為毋是家己推薦，是主所推薦的才是堪得受接納的人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。