上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多後書
1:1 我是保羅，奉上帝的旨意作基督耶穌的使徒。我及兄弟提摩太寫批互佇哥林多上帝的教會及全亞該亞省所有信徒。
1:2 願咱的父上帝及主耶穌基督賜恁恩典及平安！
保羅患難後的感恩
1:3 著稱讚咱的主耶穌基督的父上帝！伊是慈悲的父，賜逐項安慰的上帝。
1:4 佇咱一切的患難中，伊安慰咱，互咱會當用上帝賜咱的安慰去安慰許個抵著逐款患難的人。
1:5 因為基督為著咱受真多苦難，咱嘛通過基督受赫呢多的安慰。
1:6 阮若抵著患難，是欲互恁得著安慰及拯救；阮若得著安慰，嘛是欲互恁得著安慰，有氣力通忍受及阮所忍受像款的苦難。
1:7 阮對恁的向望𣍐搖動；因為阮知，恁及阮同受苦，恁嘛會及阮同受安慰。
1:8 兄弟姊妹，阮愛恁知阮佇亞細亞省所抵著的患難。阮所擔的重擔非常重，重甲擔𣍐起，致到強欲活𣍐落去。
1:9 阮家己感覺有受判死刑；按呢是欲互阮無閣倚靠家己，只有倚靠互死人閣活的上帝。
1:10 伊有救阮脫離死的危險，嘛會繼續救阮。阮向望伊將來會閣救阮。
1:11 恁嘛著用祈禱幫贊阮，按呢就有真多人會因為阮對恁真多的祈禱得著祝福來感謝上帝。
保羅改變計劃
1:12 阮所誇口的是按呢：阮的良心證明，阮佇此世間的生活攏是照上帝所賜的純潔及誠實，毋是靠屬世的智慧，是靠上帝的恩典；阮對待恁閣較是按呢。
1:13 阮寫互恁的攏是恁會曉讀會當了解的。恁到今所理解的只有一部份，我向望恁到路尾會完全了解。按呢，佇咱的主耶穌的日，恁會做阮的誇口，阮嘛做恁的誇口。
1:14 併於上節
1:15 因為有此個確信，我才計劃先去訪問恁，通互恁得著加倍的祝福；
1:16 就是計劃去馬其頓的路中先去訪問恁，閣對馬其頓倒來經過恁遐的時，互恁通送我出發去猶太。
1:17 此個計劃豈是凊採做的？我做此款計劃豈出佇自私的動機，連鞭講「是」連鞭講「毋是」？
1:18 上帝是信實，我對恁答應的話就毋是連鞭「是」連鞭「毋是」。
1:19 因為西拉、提摩太，及我傳互恁彼位上帝的子耶穌基督，並毋是連鞭「是」連鞭「毋是」的。在佇耶穌基督只有「是」若定。
1:20 上帝一切的應允佇耶穌基督攏成做「是」，所以咱才通過伊講「阿們」來歸榮光互上帝。
1:21 互阮及恁來及基督結連，閣選派阮的是上帝。
1:22 伊給阮蓋印，閣賜聖神佇阮心內做保證。
1:23 我用家己的性命懇求上帝給我作證。我是體貼恁才無去哥林多。
1:24 阮毋是啲強制恁著信什麼，反轉是啲做恁的同工，互恁通歡喜，因為恁的信心有徛在。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。