上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
11:1 恁著學我，親像我學基督。
禮拜的時罩頭巾的規定
11:2 恁不時會記得我，閣遵趁我傳授互恁的教示，恁實在通互我謳咾。
11:3 不過我愛恁明白，逐個查甫人的頭是基督，婦仁人的頭是丈夫，基督的頭是上帝。
11:4 查甫人佇公共場所祈禱抑是宣講上帝信息的時，若罩頭巾是侮辱伊的頭基督。
11:5 毋拘查某人佇祈禱抑是宣講上帝信息的時，若無罩頭巾是侮辱家己的頭，就是伊的丈夫。此款的婦仁人及頭毛互人剃起來的查某人無什麼差別。
11:6 查某人若毋罩頭巾，頭毛著剪起來；既然看剃光頭抑是剪頭毛做見笑的事，就著罩頭巾。
11:7 查甫人無應該罩頭巾，因為伊是上帝的形像及榮耀；查某人是查甫人的榮耀。
11:8 因為查甫人毋是對查某人造出來的，查某人是對查甫人造出來的。
11:9 查甫人毋是為著查某人造的，毋拘查某人是為著查甫人造的。
11:10 為著天使的緣故，查某人的頭應該罩權威的記號。
11:11 總是佇主的內面，查甫人需要查某人，查某人嘛需要查甫人。
11:12 因為查某人是對查甫人造出來的，查甫人是通過查某人生的，毋拘萬物攏是對上帝出來的。
11:13 恁著家己判斷：查某人無罩頭巾對上帝祈禱有合宜無？
11:14 自然的本性教咱，留長頭毛是查甫人的見笑，
11:15 毋拘查某人留長頭毛是伊的榮耀。因為長頭毛通做查某人的遮帕。
11:16 若有人愛辯駁，我只有會當講，佇咱及上帝的教會並無其他的規矩。
主的晚餐
11:17 我佇遮欲講的話毋是欲給恁謳咾，因為恁的聚會損害比利益較多。
11:18 第一，我有聽見講，恁佇教會聚會的時結黨分派，我相信有一部份是事實。
11:19 恁中間難免有分裂，按呢才會當看出什麼人會通過考驗。
11:20 恁聚集的時，毋是啲食主的晚餐。
11:21 因為恁逐個人趕緊食家己帶來的物件，結果有的枵，有的酒醉。
11:22 恁豈無厝通食，通飲？恁是啲藐視上帝的教會，亦啲互無物通食的人見笑是無？我欲對恁講什麼？我豈著給恁謳咾？𣍐，佇此項事我𣍐給恁謳咾！
11:23 我對主所領受的，我嘛傳互恁：主耶穌互人出賣彼暝，伊提餅，
11:24 感謝上帝了後，擘開，講：「此個是我的身軀，為著恁犧牲的；恁著做此個來記念我。」
11:25 照按呢，食了後，伊閣捧杯，講：「此個杯是新的約，用我的血設立的，恁逐擺飲的時著做此個來記念我。」
11:26 按呢，恁逐擺食此個餅，飲此個杯，是啲宣告主的死，直到伊來臨。
11:27 所以，無論什麼人，若無用合宜的態度食主的餅，飲主的杯，是得罪主的身體及血。
11:28 逐個人著省察家己才通食此個餅，飲此個杯。
11:29 恁食此個餅，飲此個杯，若無確實明白主的身軀的意思，食此個餅飲此個杯是家己惹審判。
11:30 因為按呢，佇恁中間有真多人軟弱，破病，嘛有人致到死。
11:31 咱若先省察家己，就𣍐致到受審判。
11:32 不過咱受主審判的時，是啲受管教，互咱免致到及世間同受定罪。
11:33 所以，我的兄弟姊妹，恁聚集食主的晚餐的時，著互相聽候。
11:34 若有人枵，著佇厝裡先食，才免恁聚會顛倒受上帝審判。其他的代誌，我去恁遐的時才處理。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。