上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
警戒拜偶像
10:1 兄弟姊妹，我愛恁會記得，咱的祖先攏跟隨摩西，佇雲的保護下過紅海。
10:2 𪜶佇雲內，佇海裡，受洗歸佇摩西。
10:3 𪜶攏食仝款屬靈的食物，
10:4 攏飲仝款屬靈的泉水，此個泉水是對及𪜶同行彼個屬靈的石磐流出來的；彼個石磐就是基督。
10:5 毋拘𪜶中間大部分的人無互上帝歡喜，攏受毀滅，倒甲歸曠野。
10:6 諸個代誌互咱做鑑戒，叫咱毋通親像𪜶貪戀歹代。
10:7 毋通親像𪜶中間有一寡人去拜偶像；照聖經記載：「諸個子民坐落去，大食大飲；徛起來，癲狂亂耍。」
10:8 咱毋通親像𪜶有一寡人淫亂，煞佇一日內死兩萬三千人。
10:9 毋通親像𪜶中間有一寡人試探主，煞互蛇咬死。
10:10 毋通親像𪜶中間有一寡人講怨言，煞互毀滅者剿滅。
10:11 𪜶所抵著諸個代誌通做別人的鑑戒，閣記錄落來通警戒咱諸個活佇末世的人。
10:12 所以，想講家己徛在的著謹慎，才𣍐跋倒。
10:13 恁所抵著的考驗攏是人會抵著的。上帝是信實的，伊𣍐互恁抵著擔當𣍐起的考驗。恁抵著考驗的時，伊會給恁開一條出路，互恁忍受會牢。
10:14 所以，親愛的兄弟姊妹，拜偶像的事攏毋通插著。
10:15 我看恁做明白事理的人及恁講話；我所講的恁家己通判斷。
10:16 咱啲飲彼個感謝的杯，豈毋是啲分享基督的血？咱啲食彼個擘開的餅，豈毋是啲分享基督的身軀？
10:17 因為餅只有一塊，咱雖然真多人，猶久是一體，因為咱做夥食仝一塊餅。
10:18 用以色列人做例，許個食祭物的人及祭壇有關係。
10:19 按呢我啲講的是什麼意思？是講偶像有什麼重要，祭物有什麼要緊是無？
10:20 毋是，我是啲講，獻佇異教祭壇頂的祭物是獻互鬼，毋是獻互上帝。我無愛恁及鬼交插。
10:21 恁飲主的杯，𣍐用得閣飲鬼的杯；恁參加主的宴席，𣍐用得閣參加鬼的宴席。
10:22 咱欲激主怨妒是無？咱比伊較強是無？
10:23 有人講「逐項攏通做」，不過毋是逐項攏有利益。「逐項攏通做」，不過毋是逐項事攏會當幫贊人。
10:24 逐個人攏毋通求家己的利益，著求別人的利益。
10:25 市場啲賣的肉攏通買來食，毋免為著良心的緣故問東問西。
10:26 因為聖經講：「地及地上的萬物攏屬佇主。」
10:27 若有未信者請恁食飯，恁若去，排佇恁面前的物做恁食，毋免為著良心的緣故問東問西。
10:28 毋拘若有人給恁講「諸個食物有祭過偶像」，恁就為著彼個給恁講的人及良心的緣故，食彼個食物。
10:29 我所指的是彼個人的良心，毋是恁的良心。
豈採有人會問：「我的自由哪著受別人的良心批判？
10:30 我若感謝來食，哪著因為食感謝的物受誹謗？」
10:31 所以，恁無論是食是飲，抑是做什麼，攏著為著榮耀上帝來做。
10:32 無論是對猶太人、外邦人，抑是上帝的教會，恁攏毋通成做𪜶的阻礙。
10:33 恁著照我所做的去做。我為著互大家歡喜，毋曾求家己的利益，是求大家的利益，通互𪜶得著救。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。