上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
使徒的權利及責任
9:1 我豈毋是自由的人？我豈毋是使徒？我豈毋曾見著咱的主耶穌？恁豈毋是我為著主工作的成果？
9:2 對別人來看，我豈採毋是使徒，毋拘對恁來看，我確實是。因為恁及主結連就是我作使徒的證據。
9:3 對許個批評我的人，我按呢辯明：
9:4 阮豈無權通食，通飲？
9:5 阮豈無權及其他的使徒、主的兄弟，以及彼得仝款，娶女信徒做某做夥旅行？
9:6 豈干焦我及巴拿巴一定著做工才會當生活？
9:7 豈有人作兵閣啲食家己？豈有人種作葡萄園無食園內出產的葡萄？豈有人飼羊無飲家己的羊奶？
9:8 我講諸個豈是根據人的想法？律法豈毋是嘛按呢講？
9:9 摩西的律法規定：「牛啲碖五穀的時，毋通給伊掛牛嘴籠。」上帝關心的豈是牛？
9:10 伊豈毋是完全為著咱講的？當然是！因為耕作的人囥向望耕作，收割的人囥向望收割，𪜶攏是期待得著五穀。
9:11 阮若有佇恁中間撒屬靈的種籽，對恁得著物質上的供給豈有過份？
9:12 別人若有權通對恁要求，阮豈毋是閣較有？
毋拘阮攏毋曾用此個權，反轉忍受一切，才免互基督的福音受阻礙。
9:13 恁一定知，佇聖殿啲工作的人對聖殿得著食物；佇祭壇啲獻祭的人分著壇頂的祭物。
9:14 親像按呢，主有吩咐：傳福音的人應該靠福音生活。
9:15 毋拘我攏毋曾用諸個權。我現在寫諸個話嘛毋是欲爭取此款的權。我寧可死嘛無愛互我所誇口的落空！
9:16 我傳福音並無什麼通誇口；我是奉命啲傳。我若無傳就有災禍。
9:17 我若甘願做此個工，就有報賞；我若毋是出佇甘願，嘛著執行上帝交代的任務。
9:18 按呢，我的報賞是什麼？就是我傳福音互人白白得著，毋拘家己無欲享受傳福音應該有的權利。
9:19 我是自由的人，無受人的束縛，毋拘為著欲得著較多人來信主，我成做眾人的僕人。
9:20 對猶太人，我就作猶太人，是為著欲得著猶太人。雖然我無受摩西的律法拘束，卻作律法下的人，是為著欲得著律法下的人。
9:21 對律法外的人，我就作律法外的人，是為著欲得著律法外的人。按呢毋是講我無遵守上帝的律法；其實我是受基督律法約束的人。
9:22 對信心軟弱的人，我成做軟弱，是為著欲得著軟弱的人。對叨一款人，我就作彼款人，用逐款方法通加救一寡人。
9:23 我做諸個攏是為著福音，目的是欲及人分享福音。
9:24 恁一定知，佇運動場參加競賽的人攏落去走，毋拘只有一個得著賞。親像按呢，為著欲得著賞，恁著拍拼走。
9:25 逐個選手攏有接受嚴格的訓練；𪜶按呢做是欲得著會敗壞的花冠；毋拘咱愛得著的是𣍐敗壞的花冠。
9:26 按呢，我走毋是無目標，拍拳毋是啲拍空氣。
9:27 我嚴格操練家己的身軀到會當完全控制，才免我將福音傳互別人，家己顛倒受拒絕。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。