上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
婚姻的問題
7:1 關係恁佇批的內面所寫的問題：查甫人無親近查某人較好。
7:2 毋拘為著避免淫亂的代誌，逐個查甫人應該有家己的某；逐個查某人應該有家己的翁。
7:3 查甫人對某應該盡作翁的義務；查某人對翁應該盡作某的義務。
7:4 某對家己的身軀無權，毋拘翁有；像款，翁對家己的身軀無權，毋拘某有。
7:5 毋通忽略對方的需要；若為著欲專心祈禱，通同意暫時分開；總是以後著閣回復正常的關係，才免因為𣍐當控制家己致到受撒旦誘惑。
7:6 我講通暫時分開，是勉強同意，毋是命令。
7:7 事實，我愛逐個人攏親像我。毋拘逐個人對上帝領受無仝款的恩賜，此個人此款，彼個人彼款。
7:8 現在，我對無結婚的及寡婦講，若會當親像我守獨身是較好；
7:9 毋拘若𣍐當控制家己，就著結婚。寧可結婚，比互慾火燒較好。
7:10 已經結婚的人，我命令恁 — 其實毋是我，是主的命令：查某人毋通離開丈夫，
7:11 若離開，著守獨身；若無，著閣及丈夫和好。丈夫嘛毋通放拺某。
7:12 對其他的人，我講 — 毋是主講的：男的信徒若娶無信主的人做某，某同意繼續及伊住，伊就毋通給伊放拺。
7:13 若有女的信徒及無信主的人結婚，丈夫同意繼續及伊住，伊嘛毋通放拺丈夫。
7:14 無信主的丈夫會因為信主的某得著上帝接納。親像按呢，無信主的某嘛會因為信主的丈夫得著上帝接納。若毋是按呢，𪜶的子兒就無屬上帝；其實，𪜶是屬上帝。
7:15 毋拘，無信主的人若欲離開，就出在伊離開。佇此款的情形，信主的丈夫抑是某就無受婚姻的約束。上帝呼召恁，是愛恁和睦徛起。
7:16 著知，信主的查某人豈採會救家己的丈夫。著知，信主的丈夫豈採會救家己的某。
保持受召的時的身份
7:17 無論按怎，逐個人著照主分互恁的恩賜，照上帝揀召的目的來生活。這是我互逐個教會的規定。
7:18 割禮了後才受呼召的人，毋免掩蓋割禮的記號；受呼召的時猶未割禮的人嘛毋免受割禮。
7:19 因為有割禮無割禮攏無要緊，要緊的是著遵守上帝的誡命。
7:20 逐個人著保持受召的時的身份。
7:21 你受召的時是奴隸是無，毋免掛意；不過你若有機會得著自由，著把握機會。
7:22 因為受主呼召的奴隸是主所解放的自由人；像款，受主呼召的自由人是基督的奴僕。
7:23 恁是上帝付出代價買來的，毋通成做人的奴隸。
7:24 兄弟姊妹，恁逐個人著佇上帝的面前保持受召的時的身份。
在室女及寡婦的問題
7:25 關係在室女的問題，我無對主得著什麼命令，不過做一個得著主的憐憫成做通信任的人，我提出家己的意見。
7:26 考慮目前艱難的處境，我想人保持現狀是較好。
7:27 已經娶某，毋通想欲自由；猶未娶某，毋通想欲娶。
7:28 毋拘若娶某，無算犯罪；少女若出嫁，嘛無算犯罪。不過結婚的人會加添生活上的拖累，我較愛恁免抵著此款代誌。
7:29 兄弟姊妹，我的意思是，時間逼近啦，對今以後，有某的著若準無某；
7:30 啲哭的若準無啲哭；啲歡喜的若準無啲歡喜；買物的若準無得著半項；
7:31 插世間事的，若準無啲插。因為此世間的現狀啲過去。
7:32 我愛恁攏無掛慮。無娶某的人關心主的事，看欲按怎互主歡喜。
7:33 娶某的人關心世間的事，看欲按怎互某歡喜，
7:34 煞分心。無嫁的查某人抑是少女關心主的事，是欲互身軀及心靈聖潔；不過嫁翁的查某人關心世間的事，看欲按怎互丈夫歡喜。
7:35 我對恁按呢講是為著恁的利益，毋是欲給恁束縛，是愛恁做合宜的事，通專心服事主。
7:36 若有人定婚了決定無欲娶，後來因為情慾強，𣍐當控制家己，會對未婚妻做出無合宜的事，伊著結婚，按呢做毋是犯罪。
7:37 不過伊若毋是因為外來的壓力，是出佇家己的決心，閣會當控制家己的意志，決定無欲及未婚妻結婚，互伊保持在室女的身份，伊按呢做是好。
7:38 總講，及未婚妻結婚是好，無及伊結婚閣較好。
7:39 丈夫猶活啲的時，查某人無自由；丈夫死了，查某人通自由及合意的人結婚，不過，只有通嫁互信主的人。
7:40 伊若無閣嫁是閣較有福氣，這是我的意見，總是我想我嘛有上帝的神的指示。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。