上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
6:1 上主閣命令摩西頒布以下諸個條例：
6:2 若有人犯罪得罪上主，無論佇同胞寄物件抑是抵押物件的事無守信用，抑是搶人的財物，抑是欺壓同胞，
6:3 抑是拾著物件，騙人閣咒誓講是伊的；人若有做任何一項諸個事，伊就有罪。
6:4 伊既然犯著頂面諸個罪，就著將所搶的、欺壓得著的、人寄伊的、拾著的、
6:5 白賊咒誓得著的，全部還人，另外閣加五分一；佇互人查出伊有過失的日，著還原來的主人。
6:6 伊嘛著對羊群中取一隻無瑕疵的綿羊，抑是照聖所的公秤估計羊的價值，交互祭司，做賠罪祭獻互上主。
6:7 祭司著佇上主的面前替伊贖罪；伊所做任何一項過失，攏會得著赦免。
燒化祭的條例
6:8 上主閣命令摩西
6:9 吩咐亞倫及伊的子孫頒布燒化祭的條例：
燒化祭著佇祭壇頂燒；毋通互壇頂的火化去，著歸暝燒到天光。
6:10 祭司著穿幼麻布的衫及褲，將祭壇燒燒化祭的火灰收起來，下佇壇邊。
6:11 後來著換衫，將火灰帶出去營外，倒佇禮儀上清氣的所在。
6:12 壇頂的火著不時互𤏸，毋通化去。祭司著逐早起佇壇頂添柴，閣將燒化祭排佇啲𤏸的柴頂面，嘛佇彼頂面燒平安祭的油。
6:13 壇頂的火著不時互𤏸，毋通化去。
素祭的條例
6:14 下面是素祭的條例：
亞倫的子孫著將素祭提來祭壇前，獻互上主。
6:15 伊著對素祭搣一大把幼麵粉，提一寡油及所有的乳香，下佇祭壇頂燒，代表所獻的素祭，做芳芳的祭物獻互上主。
6:16 亞倫及伊的子孫著食獻賰的素祭；毋通摻酵食，閣著佇聖的所在，就是會幕的埕食。
6:17 烘餅毋通摻酵。素祭用火燒奉獻留落來的祭物，我賞賜互祭司；及贖罪祭、賠罪祭仝款是至聖。
6:18 諸個用火燒獻互上主留落來的物件，亞倫的後代所有的查甫子孫攏通食，這是𪜶世世代代應得的份額。所有接觸著諸個祭物的，攏欲成做聖。
6:19 上主命令摩西，
6:20 佇亞倫及伊的子孫受抹油設立做祭司的時，著照逐日啲獻的素祭，奉獻一公斤的幼麵粉互上主；早起時一半，下昏時一半。
6:21 幼麵粉著佇煎盤抄油，抄互齊，提去烘，分做一塊一塊，獻互上主做芳芳的素祭。
6:22 亞倫的子孫續接伊受抹油設立做大祭司的，著獻此個祭，全部用火燒獻互上主。這是永遠的規例。
6:23 祭司奉獻的素祭著全部燒，𣍐用得食。
贖罪祭的條例
6:24 上主命令摩西
6:25 著吩咐亞倫及伊的子孫頒布贖罪祭的條例：
著佇上主的面前，佇祭壇的北旁，刣燒化祭牲生的所在，刣贖罪祭的牲生；這是至聖的祭物。
6:26 獻贖罪祭的祭司著佇聖的所在，就是佇會幕的埕食祭物。
6:27 所有接觸著諸個祭物的，攏成做聖。若有衫滴著牲生的血，著佇會幕內洗。
6:28 若用粗瓷煮祭肉，煮了著給摃破；若用銅的器具煮，煮了此個器具著鑢過，閣用水洗過。
6:29 祭司家屬的查甫人攏通食祭肉；這是至聖的物。
6:30 毋拘贖罪祭的血若帶入會幕的聖所做贖罪的路用，許個祭肉毋通食，著用火燒。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。