上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
賠罪祭
5:1 若有人受要求佇公眾的面前，為著所聽著，所看著咒誓的事作證，毋拘伊毋肯，伊就有罪，著對家己的罪負責任。
5:2 若有人摸著無清氣的物，無論是野獸、牲生，抑是蟲𧒴的身屍，雖然伊毋知，伊嘛是無清氣，猶原有罪。
5:3 若有人摸著任何互人無清氣的物，雖然伊毋知，到伊一下知，就有罪。
5:4 若有人隨便咒誓，無論出佇善意抑是惡意，雖然伊無意識著家己隨便咒誓，到伊一下知，就有罪。
5:5 若有人犯著以上諸個事的任何一項，就著承認家己犯著的罪；
5:6 嘛著因為所犯的罪，將賠罪祭的祭物帶來上主面前，就是對羊群的中間揀一隻綿羊母抑是山羊母做贖罪祭。祭司著為著彼個人贖罪。
5:7 伊若無夠力通獻羊仔，就著因為家己犯的罪，用兩隻斑鴿抑是兩隻粉鳥仔子，帶來到上主面前做賠罪祭；一隻做贖罪祭，一隻做燒化祭。
5:8 伊著將諸個帶去祭司遐；祭司著先獻贖罪祭，捘斷鳥仔的頷頸，毋拘毋通互頭離開身軀。
5:9 閣著將鳥仔的血灑佇祭壇邊，互賰的血滴佇祭壇腳。這是贖罪祭。
5:10 續接，伊著照規例獻第二隻做燒化祭。祭司按呢為彼個人贖罪，伊就得著赦免。
5:11 伊若無夠力通獻兩隻斑鴿抑是兩隻粉鳥仔子，就著因為伊所犯的罪，獻一公斤的幼麵粉做贖罪祭；毋通下油，嘛毋通摻乳香，因為這是贖罪祭。
5:12 伊著將祭物帶去祭司遐；祭司著搣一大把下佇祭壇頂，代表所獻的贖罪祭，用火燒做祭物獻互上主。這是贖罪祭。
5:13 伊佇此幾項事的中間有犯著一項，祭司著按呢給伊贖罪，伊就得著赦免；及素祭像款，所獻賰的幼麵粉攏歸互祭司。
5:14 上主閣命令摩西頒布以下諸個條例：
5:15 若有人毋是刁故意，無獻應該獻互上主的祭物致到犯罪，著對羊群中奉獻一隻無瑕疵的綿羊，抑是根據聖所的公秤，獻及彼隻羊仝款價值的銀做賠罪祭；
5:16 閣因為伊佇欲獻互上主的祭物犯罪，著加五分一交互祭司，補伊的過失。祭司著用賠罪祭的綿羊替伊贖罪，伊就得著赦免。
5:17 若有人無意中犯罪，違犯任何一項上主所命令𣍐用得做的事，伊雖然毋知，嘛有罪，就著對家己的罪負責任。
5:18 伊著照聖所的規定，對羊群中取一隻無瑕疵的綿羊來，交互祭司做賠罪祭，因為伊無意中犯罪。祭司著替伊贖罪，伊就得著赦免。
5:19 這是賠罪祭，因為伊有違犯上主的命令。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。