上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
信徒中間的糾紛
6:1 恁中間有人及別個信徒有糾紛，無佇信徒面前給伊告，哪敢對無信的人告伊？
6:2 恁豈毋知信徒欲審判世間？既然恁欲審判世間，豈𣍐曉解決小可代誌？
6:3 恁豈毋知連天使咱都欲審判，此世間日常的代誌閣較毋免講。
6:4 此款代誌，恁豈通交互無受教會尊重的外人處理？
6:5 恁實在真見笑！恁中間豈真正無一個有智慧的人通判斷信徒中間的是非？
6:6 恁竟然有信徒告信徒，甚至告到無信的人面前！
6:7 其實恁相告，表示恁已經攏輸啦。恁哪毋寧可受冤枉？哪毋寧可受剋虧？
6:8 恁顛倒冤枉人，剋虧人，甚至對會內的兄弟姊妹嘛按呢做！
6:9 豈毋知不義的人𣍐當做上帝國的子民？毋通騙家己；無論是淫亂的、拜偶像的、作男娼的、好男色的、
6:10 做賊的、貪心的、酒醉的、毀謗的、詐欺的，攏𣍐當做上帝國的子民。
6:11 恁中間有人以前是按呢。毋拘恁已經洗清氣，已經聖化歸上帝，已經通過主耶穌基督的名，閣通過咱的上帝的神，及上帝有合宜的關係。
用身軀榮耀上帝
6:12 有人講：「逐項代誌我攏通做。」毋拘毋是逐項代誌攏有利益。我嘛通講：「逐項代誌我攏通做。」毋拘我無欲互任何代誌控制。
6:13 有人講：「食物是為著腹肚，腹肚是為著食物。」著，毋拘此兩項，上帝攏會給𪜶毀壞。身軀毋是為著淫亂，是為著服事主；主會供給咱身軀的需要。
6:14 上帝有互主對死閣活，伊嘛會用伊的大能力互咱閣活。
6:15 豈毋知恁的身軀是基督的肢體？按呢，我豈通將基督的肢體互伊變做妓女的肢體？絕對毋通！
6:16 豈毋知，及妓女發生肉體關係就是及伊成做一體？因為聖經講：「兩個人欲成做一體。」
6:17 毋拘及主結合的人，就佇心靈及伊成做一體。
6:18 著拒絕淫亂。人無論犯什麼罪，攏無影響家己的身軀，不過犯淫亂的是犯罪害著家己的身軀。
6:19 豈毋知恁的身軀是聖神的殿？此位聖神𫢶佇恁內面，是恁對上帝領受的。恁毋是屬家己，是屬上帝，
6:20 因為恁是伊付出代價買來的。所以，著用恁的身軀榮耀上帝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。