上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
基督的使徒
4:1 按呢，人著看阮作基督的僕人，是上帝奧祕的管家。
4:2 對管家的要求是著對主人忠實。
4:3 我受恁抑是別人評斷，攏看做小事；連我嘛無評斷家己。
4:4 我感覺家己的良心清白，不過毋是按呢就證明我無罪。審判我的是主。
4:5 所以，時機猶未到，恁毋通批判人。等到主來臨，彼時伊會用光照烏暗中的祕密，給隱藏佇人心內的動機暴露出來。彼時，逐個人會對上帝得著稱讚。
4:6 兄弟姊妹，為著恁的緣故，我將諸個事做例用佇我本身及亞波羅的身上，互恁通對阮學習「毋通超過聖經所記載」此句話的意思。恁中間無論什麼人都毋通扶挺此個，看輕彼個。
4:7 什麼人互你想講家己比別人較𠢕？你所有的豈毋是攏對上帝領受？若按呢，你是按怎啲自誇，若準毋是對上帝領受。
4:8 恁已經逐項攏有！恁已經富足！恁給阮拺佇邊仔，家己作王。恁若真正作王毋知偌仔呢好咧，按呢我嘛通及恁做夥作王！
4:9 我想，上帝將阮諸個使徒排佇尾溜，親像死刑犯互人拖出來示眾，互世界、天使，及人看。
4:10 阮為著基督的緣故做戇人，恁卻及基督結連做巧人；阮軟弱，恁勇壯；恁受尊重，阮受看輕。
4:11 到現在，阮猶閣啲嘴焦，穿破衫，常常互人拍，逐所在流浪；
4:12 阮靠雙手拖磨度活。阮互人罵，反轉給𪜶祝福；互人迫害，阮忍受；
4:13 互人侮辱，阮用好話回答。到現在，阮猶互人看做世間的糞埽，人間的渣滓。
4:14 我寫諸個互恁，毋是欲互恁見笑，是看恁做家己親愛的子兒啲給恁教示。
4:15 恁雖然有歸萬個教督的人啲教恁識基督，毋拘老父只有一個。通過福音，我佇基督耶穌成做恁的老父。
4:16 所以我勸恁，著學我。
4:17 因為按呢，我差提摩太去恁遐。佇主的內面伊是我親愛閣忠實的子；伊會將我及基督耶穌結連的模範，就是我佇逐所在逐教會所教示的事給恁提醒。
4:18 恁中間有人想講我𣍐去恁遐，就自高自大。
4:19 若是主的意思，我連鞭會去恁遐。彼時，我就會知許個驕傲的人啲講什麼，嘛會知𪜶會當做什麼。
4:20 因為上帝國的實現毋是靠言辭，是靠權能。
4:21 恁愛叨一項？我去恁遐的時，恁愛我攑箠仔抑是帶溫柔疼痛的心？
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。