上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哥林多前書
1:1 我是保羅，奉上帝的旨意受召作基督耶穌的使徒。我及咱的兄弟所提尼
1:2 寫批互佇哥林多上帝的教會，就是許個及佇逐所在呼叫咱的主耶穌基督的名，及基督耶穌結連受召作信徒歸屬上帝的人；基督是𪜶的主，嘛是咱的主。
1:3 願咱的父上帝及主耶穌基督賜恁恩典及平安！
通過基督得著的祝福
1:4 我時常為著恁啲感謝我的上帝，因為伊通過基督耶穌賜恁恩典，
1:5 互恁通過基督逐項得著富足，充滿逐款口才及智識。
1:6 基督的信息已經佇恁中間堅固建立，
1:7 互恁攏無欠什麼恩賜，聽候咱的主耶穌基督顯現。
1:8 伊嘛會互恁堅固直到最後，佇咱的主耶穌基督的日無通嫌。
1:9 上帝是信實，伊呼召恁，欲互恁及伊的子咱的主耶穌基督結連。
教會的分裂
1:10 兄弟姊妹，我奉咱的主耶穌基督的名勸恁大家，講話著一致；恁中間嘛毋通分裂。著團結，有像款的想法及共同的目標。
1:11 我的兄弟姊妹，革來𪜶兜的人有對我講起恁中間有紛爭。
1:12 我按呢講是因為恁中間意見紛紛；有的講「我屬保羅」；有的講「我屬亞波羅」；有的講「我屬彼得」；嘛有的講「我屬基督」。
1:13 基督竟然互人分割啦！保羅豈有替恁釘死佇十字架？恁豈有奉保羅的名領受洗禮？
1:14 感謝上帝，基利司布及該猶以外，我無給恁中間什麼人洗禮。
1:15 按呢無人會當講，恁有奉我的名領受洗禮。
1:16 有啦，我嘛有給司提法那一家的人洗禮，其他有給別人洗禮抑無，我𣍐記得。
1:17 基督無差我給人洗禮，是欲傳福音，毋是用智慧的言辭傳，才免互基督的十字架失去效力。
基督是上帝的大能力及智慧
1:18 十字架的信息，對許個向滅亡啲行的人是愚戇，不過對咱諸個向得救啲行的人是上帝的大能力。
1:19 因為聖經有記載：
我欲消滅智慧的人的智慧；
我欲棄拺聰明的人的聰明。
1:20 按呢智慧的人佇叨位？經學教師佇叨位？此世代的雄辯家佇叨位？上帝已經互此世間的智慧變做愚戇啦！
1:21 既然世間人𣍐當靠家己的智慧認識上帝，上帝就對伊的智慧歡喜用阮所傳愚戇的信息來拯救信伊的人。
1:22 猶太人求神跡，希臘人尋智慧，
1:23 不過阮宣揚釘十字架的基督。此個信息對猶太人是阻礙，對外邦人是愚戇，
1:24 毋拘對上帝所揀召的人，無論是猶太人抑是希臘人，此個信息是基督；伊是上帝的大能力，是上帝的智慧。
1:25 因為上帝的愚戇贏過人的智慧，上帝的軟弱比人較勇壯。
1:26 兄弟姊妹，著會記得上帝呼召恁的時，照人的標準，恁中間無偌多人有智慧，無偌多人有能力，無偌多人屬上流階級。
1:27 上帝故意用世間人看做戇的代誌來互巧的人見笑；上帝用世間人看做弱的代誌來互強的人見笑。
1:28 上帝用卑賤的，世間人所藐視的，看毋上目的代誌來破壞人所看重的；
1:29 對按呢，世間就無人會當佇上帝的面前誇口。
1:30 毋拘上帝互恁及基督耶穌結連，互基督成做咱對上帝來的智慧，就是互咱及上帝有合宜的關係，像時成做上帝聖潔的子民，閣得著自由。
1:31 照聖經所記載：「欲誇口的人著誇口主！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。