上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
贖罪祭
4:1 上主閣命令摩西
4:2 著對以色列人宣布：
若有人無意中犯罪，違犯任何一項上主所命令𣍐用得做的事，伊著照下面的條例辦理：
4:3 大祭司若犯罪，連累人民，就著因為所犯的罪用無瑕疵的牛仔獻互上主做贖罪祭。
4:4 伊著給彼隻牛仔牽來上主的會幕門口，按手佇牛仔的頭殼頂，佇上主的面前給刣。
4:5 大祭司著給一寡牛仔的血提來會幕，
4:6 用指頭仔搵血，佇上主的面前對聖所的帳簾灑七遍。
4:7 伊閣著用一寡血，佇上主的面前抹佇會幕內香壇的四支翹起來的角；然後將牛仔賰的血攏倒佇會幕門口獻燒化祭的祭壇腳。
4:8 伊著對彼隻贖罪祭的牛仔取油，就是將腹內及伊頂面的油、
4:9 兩粒腰子及𪜶邊仔的油，以及肝及伊的網紗攏提起來，
4:10 及對平安祭的牛仔提起來的作法仝款。伊著將諸個下佇獻燒化祭的祭壇頂燒。
4:11 牛仔的皮、所有的肉，以及伊的頭、腿、腹內，及糞，
4:12 就是歸隻牛仔，著帶出去營外啲摒火灰，禮儀上清氣的所在，下佇啲𤏸的柴頂面燒。
4:13 以色列全體會眾若無意中犯罪，違犯任何一項上主所命令𣍐用得做的事，毋拘會眾猶未發見，
4:14 到𪜶一下知家己有犯罪，就著牽一隻牛仔來到會幕門口獻做贖罪祭。
4:15 會眾的長老著佇上主的面前，按手佇彼隻牛仔的頭殼頂，佇會幕門口給刣。
4:16 大祭司著給一寡牛仔的血帶來會幕，
4:17 用指頭仔搵血，佇上主的面前對聖所的帳簾灑七遍。
4:18 伊閣著用一寡血，佇上主的面前抹佇會幕內香壇的四支翹起來的角；然後將賰的血攏倒佇會幕門口獻燒化祭的祭壇腳。
4:19 伊著將所有的油提起來，下佇祭壇頂燒。
4:20 此隻牛仔處理的方法，及為著大祭司贖罪彼隻牛仔的作法仝款；大祭司著按呢替𪜶贖罪，𪜶就欲得著赦免。
4:21 祭司著將牛仔帶出去營外燒，親像燒頭一隻牛仔按呢。這是會眾的贖罪祭。
4:22 若有官長無意中犯罪，違犯任何一項上主 — 伊的上帝所命令𣍐用得做的事，
4:23 到伊一下知家己有犯罪，就著牽一隻無瑕疵的山羊做祭物。
4:24 伊著佇上主的面前，按手佇山羊的頭殼頂，佇刣燒化祭的牲生的所在刣彼隻山羊。這是贖罪祭。
4:25 祭司著用指頭仔搵贖罪祭的血，抹佇獻燒化祭的祭壇四支翹起來的角，閣將賰的血攏倒佇獻燒化祭的祭壇腳。
4:26 羊仔所有的油著下佇壇頂燒，及處理平安祭的油的作法仝款；祭司按呢為彼個人贖罪，伊就得著赦免。
4:27 住佇此個地的人民若有人無意中犯罪，違犯任何一項上主所命令𣍐用得做的事，
4:28 到伊一下知家己有犯罪，就著為著伊的罪，獻一隻無瑕疵的山羊母做祭物。
4:29 伊著按手佇彼隻贖罪牲生的頭殼頂，佇刣燒化祭的牲生的所在刣彼隻贖罪的牲生。
4:30 祭司著用指頭仔搵山羊母的血，抹佇獻燒化祭的祭壇四支翹起來的角；賰的血攏著倒佇祭壇腳。
4:31 奉獻的人著將所有的油提起來，及提平安祭牲生的油仝款。祭司著佇壇頂燒許個油，做芳芳的祭物獻互上主。祭司按呢為彼個人贖罪，伊就得著赦免。
4:32 人若欲獻綿羊做贖罪祭的祭物，著獻一隻無瑕疵母的綿羊。
4:33 伊著按手佇彼隻贖罪牲生的頭殼頂，佇刣燒化祭的牲生的所在刣彼隻贖罪的牲生。
4:34 祭司著用指頭仔搵綿羊母的血，抹佇獻燒化祭的祭壇四支翹起來的角；賰的血攏著倒佇祭壇腳。
4:35 奉獻的人著將所有的油攏提起來，及提平安祭牲生的油仝款。祭司著佇壇頂用火燒許個油做祭物，獻互上主。祭司按呢為彼個人贖罪，伊就得著赦免。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。