上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
搭會幕
40:1 上主吩咐摩西，講：
40:2 「正月初一，你著將會幕的布棚搭起來。
40:3 著將約櫃下佇彼內面，用帳簾給伊隔開；
40:4 將排獻祭的餅的桌搬入去，給桌頂的物件排好勢；嘛將燈台搬入去，給燈點𤏸。
40:5 著將燒香的金壇下佇約櫃的頭前，然後掛會幕入口的門簾；
40:6 將燒化祭的祭壇下佇會幕的布棚門口；
40:7 將洗盪的盆下佇會幕及祭壇的中間，內面貯水。
40:8 聖所的四圍著有埕，埕的入口著掛門簾。
40:9 「你著用聖油抹會幕及內面所有的器具，將會幕及攏總的器具分別作聖，諸個就攏成做聖。
40:10 閣抹燒化祭的祭壇及伊攏總的器具，給壇分別作聖，壇就成做至聖；
40:11 嘛著抹洗盪的盆及盆座，給𪜶分別作聖。
40:12 「你著導亞倫及伊的子來會幕的入口，用水給𪜶洗。
40:13 嘛著給亞倫穿聖的禮服，給伊抹油，互伊分別作聖做祭司服事我。
40:14 閣導亞倫的子來，給𪜶穿內袍，
40:15 給𪜶抹油，親像給𪜶老父抹油仝款，互𪜶做祭司服事我；𪜶受抹油，就世世代代永遠得著祭司的職份。」
40:16 諸個，摩西攏照上主的吩咐做。
40:17 第二年正月初一，會幕就搭起來。
40:18 摩西搭會幕，下許個座，徛許個板，穿許個橫楗，𫞼許個柱。
40:19 伊佇會幕的頂面蓋布篷，佇布篷的頂面閣蓋上等的皮，攏照上主對摩西的吩咐做。
40:20 伊閣將法版下佇約櫃內面，給槓穿佇約櫃雙旁，將蓋蓋佇約櫃頂面，
40:21 扛約櫃入會幕，掛隔開的帳簾遮約櫃，攏照上主對摩西的吩咐做。
40:22 摩西將排獻祭的餅的桌搬入會幕，下佇布棚的北旁，佇帳簾外面；
40:23 桌頂排奉獻互上主的餅，攏照上主對摩西的吩咐做。
40:24 伊閣將燈台下佇會幕內，佇會幕的南旁，桌的對面，
40:25 佇上主的面前點燈；攏照上主對摩西的吩咐做。
40:26 伊閣將金的香壇下佇會幕內面，帳簾的頭前；
40:27 佇彼頂面燒芳芳的香；攏照上主對摩西的吩咐做。
40:28 伊佇會幕的布棚的入口掛門簾，佇門簾的頭前下燒化祭的祭壇，佇彼頂面獻燒化祭及素祭；攏照上主對摩西的吩咐做。
40:29 併於上節
40:30 伊將洗盪的盆下佇會幕及祭壇的中間，盆內貯水。
40:31 摩西、亞倫及伊許個子入會幕抑是倚近壇的時，先佇遐洗手，洗腳；攏照上主對摩西的吩咐做。
40:32 併於上節
40:33 最後，摩西佇會幕及祭壇的周圍設埕，佇埕的入口掛門簾。按呢，摩西就完成搭會幕的工作。
上主的榮光充滿會幕
40:34 ( 民 9:15-23 )
彼時，雲遮蓋會幕，上主的榮光充滿布棚。
40:35 摩西𣍐當入會幕，因為雲停佇彼頂面，閣上主的榮光充滿布棚。
40:36 雲對會幕升高的時，以色列人就出發向前行。
40:37 雲若停啲，𪜶就無出發，聽候到雲升高。
40:38 日時，上主的雲停佇會幕頂，暝時雲中有火；佇以色列全家歸個行程，𪜶攏有親目看著。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。