上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
做祭司聖的禮服
39:1 ( 出 28:1-14 )
諸個師傅照上主對摩西的吩咐，用藍色、紫色、朱紅色的紗，用幼工做亞倫佇聖所服事欲穿的聖的禮服。
39:2 𪜶用金線，及藍色、紫色、朱紅色的紗，以及挲過的幼麻做以弗得；
39:3 就是將金仔拍互薄薄薄，剪做線，摻佇藍色、紫色、朱紅色的紗，及幼麻，用奇巧的手路織做夥。
39:4 𪜶閣做肩帶，及以弗得的雙旁連做夥。
39:5 以弗得的腰帶及以弗得仝款用奇巧的手路，用金線及藍色、紫色、朱紅色的紗，以及挲過的幼麻織起來，及以弗得連做一個，攏照上主對摩西的吩咐做。
39:6 𪜶閣琢兩塊紅瑪瑙，鑲佇金框裡，用刻印仔的手路將雅各的子的名刻佇彼頂面；
39:7 安佇以弗得的肩帶，做以色列人的紀念石；攏照上主對摩西的吩咐做。
造胸袋
39:8 ( 出 28:15-30 )
𪜶做一個判斷的胸袋，用及做以弗得仝款奇巧的手路，用金線及藍色、紫色、朱紅色的紗，以及挲過的幼麻做。
39:9 胸袋是四方的，拗雙層；長闊攏二十二公分。
39:10 胸袋頂面鑲四綴寶石；第一綴是紅寶石、黃玉、赤玉；
39:11 第二綴是綠寶石、藍寶石、金鋼石；
39:12 第三綴是紫瑪瑙、白瑪瑙、紫色的水晶；
39:13 第四綴是青玉、紅瑪瑙、碧玉；諸個攏鑲佇金框。
39:14 諸個寶石照雅各的子的名，共十二塊，用刻印仔的手路，逐塊刻一個名，代表十二支族。
39:15 𪜶用純金拍兩條鍊仔，親像絞索仔，安佇胸袋。
39:16 𪜶閣做兩個金的框及兩個金環，將此兩個環安佇胸袋的雙頭，
39:17 將彼兩條金鍊仔連佇胸袋雙頭兩個環，
39:18 用兩條鍊仔的雙頭連佇兩個框，安佇以弗得肩帶的頭前。
39:19 𪜶做兩個金環，安佇胸袋雙頭的墘，近以弗得向內面彼旁。
39:20 閣做兩個金環，安佇以弗得頭前的肩帶下面，倚近相連的所在，用奇巧的手路織的以弗得的帶頂面。
39:21 𪜶用藍色的幼帶，將胸袋的環及以弗得的環縛做夥，貼佇用奇巧的手路織的以弗得的帶，將胸袋及以弗得固定啲。諸個攏照上主對摩西的吩咐做。
做祭司其他的禮服
39:22 ( 出 28:31-43 )
𪜶用織布的方法做穿佇以弗得內面的外袍，歸領是藍色的。
39:23 袍頂面的對中，為著頭殼留一個孔，周圍織領緣，親像戰甲的領孔，才免破裂。
39:24 袍的下腳蒲用藍色、紫色、朱紅色的紗做石榴。
39:25 閣用純金做鈃鈴仔，下佇石榴及石榴的中間；
39:26 袍歸個下腳蒲，一個鈃鈴仔一粒石榴，一個鈃鈴仔一粒石榴，通穿來服事上主。諸個攏照上主對摩西的吩咐做。
39:27 𪜶用織布的方法為亞倫及伊的子做幼麻的內袍、
39:28 禮帽，及頭巾，用挲過的幼麻做禮褲。
39:29 閣用挲過的幼麻，及藍色、紫色、朱紅色的紗，用刺繡的手路做腰帶；諸個攏照上主對摩西的吩咐做。
39:30 𪜶用純金做禮帽的牌，用刻印仔的手路刻「聖化歸上主」。
39:31 閣用一條藍色的帶，將彼塊牌縛佇禮帽的頭前；諸個攏照上主對摩西的吩咐做。
會幕完工
39:32 ( 出 35:10-19 )
按呢，會幕的布棚所有的工程攏完成。上主命令摩西所著做的，以色列人攏照按呢做。
39:33 𪜶將會幕，就是布篷及所有的器具送去摩西遐，有鉤仔、板、橫楗、柱、有榫孔的座、
39:34 蓋布篷染做紅色的羊的皮及上等的皮、遮約櫃的蓋的帳簾、
39:35 約櫃及伊的槓、伊的蓋、
39:36 排獻祭的餅的桌及伊的器具、獻祭的餅、
39:37 純金的燈台及伊的燈盞、燈台的器具及點燈的油、
39:38 金的香壇、通抹的聖油及芳的香料、會幕的門簾、
39:39 銅的祭壇及銅的網仔、祭壇的槓及壇所有的器具、洗盪的盆及盆座、
39:40 埕四圍的帷及伊的柱、有榫孔的座及埕的門簾、杙仔及索仔、布篷及會幕內面所有的器具，
39:41 以及幼工做的禮服，就是祭司亞倫佇聖所穿來服事的聖的禮服，及伊的子做祭司啲穿的禮服。
39:42 上主命令摩西所著做的，以色列人攏照按呢做。
39:43 摩西看著所有的工程，攏有照上主的吩咐完成，就給𪜶祝福。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。