上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
巴別塔
11:1 彼時，天下的腔口及語言攏仝款。
11:2 𪜶向東旁遷徙的時，佇示拿地發見一片平原，就佇遐徛起。
11:3 𪜶互相參詳講：「來！咱著來做磚仔，燒互透。」𪜶就用磚仔代替石頭，用打馬膠代替灰土。
11:4 𪜶閣講：「來！咱著來起城造塔，塔頂迵天，互咱出名，才免咱四散佇全地。」
11:5 上主落來，欲看世間人起造的城及塔。
11:6 上主講：「看咧，𪜶是仝一個民族，講像一個語言。今，𪜶已經開始做此個事，以後𪜶欲做的，攏𣍐當給𪜶阻擋。
11:7 來！咱落來去，拍亂𪜶的語言，互𪜶的話𣍐相通。」
11:8 上主就互𪜶對遐分散佇全地；𪜶就停工，無起彼座城。
11:9 所以彼個城叫做巴別，因為上主佇遐拍亂天下的語言，閣對遐互人分散佇全地。
閃的後代
11:10 ( 代上 1:24-27 )
下面是閃的後代：
大水以後兩年，閃一百歲生亞法撒。
11:11 閃生亞法撒了後，猶活五百年，閣有生後生查某子。
11:12 亞法撒三十五歲生沙拉。
11:13 亞法撒生沙拉了後，猶活四百空三年，閣有生後生查某子。
11:14 沙拉三十歲生希伯。
11:15 沙拉生希伯了後，猶活四百空三年，閣有生後生查某子。
11:16 希伯三十四歲生法勒。
11:17 希伯生法勒了後，猶活四百三十年，閣有生後生查某子。
11:18 法勒三十歲生拉吳。
11:19 法勒生拉吳了後，猶活兩百空九年，閣有生後生查某子。
11:20 拉吳三十二歲生西鹿。
11:21 拉吳生西鹿了後，猶活兩百空七年，閣有生後生查某子。
11:22 西鹿三十歲生拿鶴。
11:23 西鹿生拿鶴了後，猶活兩百年，閣有生後生查某子。
11:24 拿鶴二十九歲生他拉。
11:25 拿鶴生他拉了後，猶活一百十九年，閣有生後生查某子。
11:26 他拉七十歲生亞伯蘭、拿鶴、哈蘭。
他拉的後代
11:27 下面是他拉的後代：
他拉生亞伯蘭、拿鶴、哈蘭；哈蘭生羅得。
11:28 哈蘭佇伊的老父他拉猶活啲的時，死佇故鄉巴比倫的吾珥城。
11:29 亞伯蘭及拿鶴攏有娶某。亞伯蘭的某叫做莎萊；拿鶴的某叫做蜜迦，是哈蘭的查某子；哈蘭是蜜迦的老父，嘛是亦迦的老父。
11:30 莎萊𣍐生育，無生子。
11:31 他拉導伊的子亞伯蘭及孫羅得，就是哈蘭的子，以及伊的新婦莎萊，就是亞伯蘭的某，做夥離開巴比倫的吾珥城，欲去迦南地；𪜶到哈蘭就住佇遐。
11:32 他拉活兩百空五歲，死佇哈蘭。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。