上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
上主命令子民離開西奈山
33:1 上主對摩西講：「你及你對埃及導出來的人民，著對遮出發去彼個我對亞伯拉罕、以撒、雅各立誓，應允欲賞賜𪜶的後代的土地。
33:2 我欲差使者佇你的頭前，欲將迦南、亞摩利、赫、比利洗、希未、耶布斯許個族趕出去。
33:3 恁著進入彼個流奶及蜜的地，毋拘我無欲親身及恁做夥去，因為恁是心硬固執的民族，才免我佇路裡給恁消滅。」
33:4 人民聽著此個歹消息，就非常傷心，無人妝飾打扮。
33:5 上主對摩西講：「你著給以色列人講：『恁是心硬固執的民族。我若及恁做夥，就是一時仔久，一定會給恁消滅。今，恁著將身軀的裝飾品剝落來，我會決定欲按怎對待恁。』」
33:6 以色列人對離開何烈山以後，就將身軀的裝飾品攏剝落來。
摩西入會幕
33:7 摩西佇營外有赫遠啊的所在搭一個布棚。伊給此個布棚叫做會幕；所有尋求上主的人，通去營外的會幕遐。
33:8 摩西欲去會幕遐的時，所有的人民攏起來徛佇家己布棚的門口，看摩西進入會幕。
33:9 摩西入會幕的時，雲柱降落佇會幕的門口；上主就及摩西講話。
33:10 所有的人民看著雲柱降落佇會幕的門口，就攏起來，佇逐個人的布棚門口跪拜。
33:11 上主及摩西面對面講話，親像人啲及朋友講話。摩西倒轉來營內的時，跟隨摩西的少年人嫩的子約書亞無離開會幕。
上主應允及子民同在
33:12 摩西對上主講：「上主，你有交代我，著導此個人民去彼個所在，毋拘你無互我知，欲派什麼人及我做夥去。你只有給我講，你指名揀召我，閣真意愛我。
33:13 你若真正意愛我，求你將你的道路指示我，互我認識你，通得著你的恩典；求你會記得此個民族是你的子民。」
33:14 上主講：「我欲親身及你去，互你安心。」
33:15 摩西對上主講：「你若無欲親身及我去，就毋通叫阮對遮上去彼個所在。
33:16 阮欲按怎知，你有好款待我及你的子民？豈毋是因為你有及阮做夥去，互我及你的子民，及地上萬族有分別？」
33:17 上主對摩西講：「你講的此項代誌，我會做，因為我意愛你，閣指名揀召你。」
33:18 摩西講：「求你互我看見你的榮光。」
33:19 上主講：「我欲佇你的面前顯示我一切的媠、一切的好，閣欲對你宣布上主的名。我欲憐憫我愛憐憫的，體貼我愛體貼的。」
33:20 伊閣講：「你𣍐用得看我的面，因為無人會當看見我猶會活。」
33:21 上主閣講：「你來徛𫢶我邊仔此塊石磐頂。
33:22 我的榮光經過的時，我欲給你下佇石磐的縫，用我的手蹄給你遮啲，聽候我過去；
33:23 然後我欲給我的手勼轉來，你就會看見我的尻脊骿，毋拘𣍐當看見我的面。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。