上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
金牛
32:1 ( 申 9:6-29 )
以色列人看摩西一直無落山，就攏倚去亞倫遐，給伊講：「今，你著給阮造神明，通給阮導路；因為彼個導阮出埃及的摩西，毋知抵著什麼代誌。」
32:2 亞倫給𪜶講：「恁的某、恁的子、查某子的金耳鉤攏剝起來互我。」
32:3 人民就將𪜶的金耳鉤攏剝落來互亞倫。
32:4 亞倫就做一個模，將諸個金仔鑄做一隻牛仔。
人民就講：「以色列人啊，此個就是導咱出埃及的神明。」
32:5 亞倫看了，就佇金牛仔的面前起祭壇。伊宣布講：「明仔載是上主的節日，大家著攏來慶祝。」
32:6 隔日透早，人民起來獻燒化祭及平安祭；𪜶坐啲大食大飲，起來跳舞滾笑。
32:7 上主對摩西講：「趕緊！你趕緊落山。你對埃及導出來的人民已經墮落。
32:8 𪜶真緊偏離我命令𪜶的道路，為家己鑄一隻牛仔，給伊跪拜，獻祭，閣講：『以色列人，這就是導恁出埃及的神明。』」
32:9 上主對摩西講：「我看此個民族真正是心硬固執。
32:10 今你著出在我，我欲對𪜶發大受氣，給𪜶消滅；我欲互你成做大國。」
32:11 摩西就對上主 — 伊的上帝求情，講：「上主啊，你是按怎欲對你的子民發大受氣？𪜶豈毋是你用大氣力大權能的手，對埃及導出來的？
32:12 你豈欲互埃及人講『伊導𪜶出去，是欲害𪜶，佇山裡給𪜶刣死，互𪜶對地上消滅』？求你回心轉意，毋通對你的子民發大受氣，毋通降災禍互𪜶。
32:13 求你會記得你的僕人亞伯拉罕、以撒、雅各；你曾指家己對𪜶立誓，講：『我欲互恁的後代親像天頂的星赫多；閣將我所應允彼個地，全部賞賜互恁的後代，做𪜶永遠的產業。』」
32:14 對按呢，上主就改變心意，無將所講的災禍降互伊的子民。
32:15 摩西越轉身落山，手提兩塊雙面有寫字的石版。
32:16 石版是上帝做的，誡命是上帝寫的，刻佇石版。
32:17 約書亞一下聽著人民喧嘩的聲，就對摩西講：「佇營內有相刣的聲。」
32:18 摩西講：
「這毋是刣贏歡呼的聲，
嘛毋是刣輸哀叫的聲；
我聽著的是唱歌的聲。」
32:19 摩西行近營地，看著金牛仔，閣看著人啲跳舞，就非常受氣，給手裡彼兩塊石版㧒落山腳，石版碎去。
32:20 伊閣將𪜶鑄的牛仔像用火燒，研做粉，撒佇水面，叫以色列人飲。
32:21 摩西給亞倫講：「此個人民是給你按怎，你竟然互𪜶犯即大的罪？」
32:22 亞倫講：「我的主，請你赫呢受氣。你知，此個人民決心做歹。
32:23 𪜶對我講：『你著給阮造一個神明，通給阮導路，因為彼個導阮出埃及的摩西，毋知抵著什麼代誌。』
32:24 我給𪜶講：『所有的金仔攏剝落來互我。』我給金仔㧒落火裡，此隻牛仔就出現。」
32:25 摩西看著人民放縱，亞倫閣出在𪜶，致到𪜶受對敵恥笑，
32:26 就徛佇營地門口，講：「欲徛上主此旁的，著來我遮。」利未人就攏聚集來伊遐。
32:27 伊對利未人講：「上主 — 以色列的上帝按呢講：『恁逐個人腰著插刀，對此個門到彼個門，巡視全營，刣死兄弟、厝邊，及朋友。』」
32:28 利未人就照摩西的話做。彼日，人民受刣死的大約有三千人。
32:29 摩西講：「恁將家己奉獻互上主，逐個人攻擊家己的子及兄弟，今仔日上主會賜福恁。」
32:30 隔日，摩西對人民講：「恁有犯重罪；現在我欲上去上主遐，豈採會當為恁贖罪。」
32:31 摩西就倒轉去上主遐，講：「唉！此個人民犯重罪，為家己造金的神像。
32:32 今，懇求你赦免𪜶的罪；你若毋，求你對你記錄的冊，給我的名擦消。」
32:33 上主對摩西講：「什麼人得罪我，我就欲對我的冊擦消伊的名。
32:34 今，你著導此個人民去我給你指示的所在。我的使者欲給你導路；毋拘到我審判的日，我欲辦𪜶的罪。」
32:35 上主降災禍互人民，因為𪜶及亞倫做夥造金牛仔。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。