上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌互人押去見彼拉多
27:1 ( 可 15:1 路 23:1-2 約 18:28-32 )
透早，所有的祭司長及民間的長老鬥陣參詳欲陷害耶穌，給伊處死刑。
27:2 𪜶給耶穌縛起來，押去交互羅馬總督彼拉多。
猶大的死
27:3 ( 徒 1:18-19 )
出賣耶穌的猶大看著耶穌已經受定罪，就後悔，提彼三十個銀仔去還互許個祭司長及長老，
27:4 講：「出賣無辜的人，我有罪啦！」
𪜶應講：「無阮的代誌，你家己負責！」
27:5 猶大將許個銀仔㧒佇聖殿的內面就離開，去吊死。
27:6 許個祭司長將銀仔拾起來，講：「這是血錢，無應該囥入聖殿的金庫。」
27:7 𪜶參詳了，決定用諸個錢去買燒瓷人的園，通埋葬出外人。
27:8 所以彼個園到今仔日猶叫做血園。
27:9 此個代誌應驗上帝通過先知耶利米所講的話：「𪜶提彼三十個銀仔，就是以色列人為著伊估計的價錢，
27:10 照主所命令我的，去買彼坵燒瓷人的園。」
耶穌佇彼拉多面前受審
27:11 ( 可 15:2-5 路 23:3-5 約 18:33-38 )
耶穌徛佇總督的面前，總督問伊講：「你是猶太人的王是無？」
耶穌應講：「這是你講的。」
27:12 許個祭司長及長老控告耶穌的時，伊攏無應。
27:13 後來彼拉多對伊講：「𪜶給你控告即多項代誌，你豈無聽見？」
27:14 耶穌猶原無給伊應，連一句嘛無，總督煞感覺非常奇怪。
耶穌受判死刑
27:15 ( 可 15:6-15 路 23:13-25 約 18:39-19:16 )
逐年的𨃟過節，照慣例總督攏有放一個群眾愛放的犯人。
27:16 彼時抵好有一個大家攏識的犯人，名叫做耶穌‧巴拉巴。
27:17 所以，群眾聚集的時，彼拉多問𪜶講：「恁愛我放叨一個互恁？耶穌‧巴拉巴，抑是稱做基督的耶穌？」
27:18 彼拉多知𪜶是因為怨妒才將耶穌交互伊。
27:19 彼拉多開庭審問的時，伊的夫人差人來給伊講：「彼個義人的代誌，你千萬毋通插；昨暗我佇眠夢中因為伊受真多苦。」
27:20 許個祭司長及長老煽動民眾，教𪜶著要求放巴拉巴，給耶穌處死刑。
27:21 總督閣問𪜶：「此兩個人恁愛我放叨一個互恁？」
𪜶應：「巴拉巴！」
27:22 彼拉多問𪜶：「按呢，彼個稱做基督的耶穌，恁愛我按怎處理？」
群眾攏應：「給釘十字架！」
27:23 彼拉多講：「是按怎？伊有做什麼歹代誌？」
𪜶閣較大聲喝：「給釘十字架！」
27:24 彼拉多看已經無採工，強欲引起暴動，就提水佇群眾面前洗手，講：「恁家己負責。」
27:25 民眾攏應講：「此個人的血債，阮及阮的子孫來承擔。」
27:26 彼拉多就放巴拉巴互𪜶，閣命令人用鞭拍耶穌，然後交伊去釘十字架。
兵士戲弄耶穌
27:27 ( 可 15:16-20 約 19:2-3 )
總督的兵士押耶穌入去總督府，召集全隊的兵給伊圍起來。
27:28 𪜶將耶穌的衫褪起來，給伊穿朱紅色的長袍，
27:29 閣用刺仔編一頂王冠給戴佇頭殼頂，將一支蘆竹仔互伊攑佇正手。𪜶閣跪佇伊的面前戲弄，講：「猶太人的王萬歲！」
27:30 𪜶閣給伊呸嘴涎，攑彼支蘆竹仔捽伊的頭殼。
27:31 𪜶給伊戲弄了後，將彼領長袍給褪起來，閣將伊家己的衫給穿倒轉去，然後交伊去釘十字架。
耶穌受釘十字架
27:32 ( 可 15:21-32 路 23:26-43 約 19:17-27 )
𪜶出去的時抵著一個古利奈人，名叫做西門。𪜶強迫伊夯耶穌的十字架。
27:33 𪜶到一個所在叫做各各他，就是「頭殼碗嶺」，
27:34 就用摻苦膽的酒互耶穌飲；伊啖一下，毋飲。
27:35 兵士釘耶穌佇十字架了後抽籤分伊的衫，
27:36 然後坐佇遐顧守。
27:37 𪜶佇伊的頭殼頂釘一個罪狀，寫講：「此個是猶太人的王耶穌。」
27:38 有兩個強盜及耶穌做夥釘十字架，一個佇正旁，一個佇倒旁。
27:39 對遐經過的人給伊侮辱，搖頭，
27:40 講：「你此個人，講欲拆毀聖殿三日內閣起起來，著救你家己。你若是上帝的子，著對十字架落來！」
27:41 祭司長、經學教師，及長老嘛攏按呢給伊恥笑，講：
27:42 「伊救別人，無法度救家己。伊是以色列的王，現在著對十字架落來，咱就信伊。
27:43 伊信靠上帝；上帝若欲救伊，現在著救伊，因為伊講：『我是上帝的子。』」
27:44 及耶穌做夥釘十字架彼兩個強盜嘛仝款給伊侮辱。
耶穌的死
27:45 ( 可 15:33-41 路 23:44-49 約 19:28-30 )
對中晝起續到下晡三點，全地攏烏暗。
27:46 下晡三點左右，耶穌大聲喝：「以利，以利，拉馬撒北大尼？」意思是「我的上帝，我的上帝，你是按怎放拺我？」
27:47 有一寡徛佇遐的人聽著，講：「此個人啲叫以利亞。」
27:48 其中有一個人隨時走去提海綿，浸酸酒，縛佇蘆竹仔尾，㧣去互耶穌𠲿。
27:49 其他的人講：「等一下！看以利亞會來給伊救𣍐。」
27:50 耶穌閣大聲喝一聲，氣就斷。
27:51 忽然，聖殿內的帳簾對頂到下裂做兩旁；地大振動，石磐爆裂；
27:52 墓嘛開；有真多已經死去的上帝子民的屍體攏閣活起來。
27:53 耶穌閣活以後許個人對墓出來，入去聖城，出現互真多人看見。
27:54 彼個軍官及做夥顧守耶穌的兵士看著地動及所發生的代誌，非常驚惶，講：「此個確實是上帝的子！」
27:55 佇遐有真多婦仁人對遠遠啲看；𪜶是對加利利隨耶穌來侍候伊的，
27:56 其中有末大拉的馬利亞、雅各及約瑟的老母馬利亞、閣有西庇太兩個子的老母。
耶穌的安葬
27:57 ( 可 15:42-47 路 23:50-56 約 19:38-42 )
黃昏的時，有一個亞利馬太的好額人來，伊名叫做約瑟，嘛是耶穌的門徒。
27:58 此個人去見彼拉多，請求將耶穌的遺體互伊。彼拉多就吩咐人將遺體互伊。
27:59 約瑟給耶穌的遺體收落來以後，用清氣的幼麻布包起來，
27:60 然後給伊安葬佇家己的新墓，就是約瑟拍佇石壁裡的墓。伊閣翱一塊大塊石來塞佇墓口才離開。
27:61 彼時，有末大拉的馬利亞及別個馬利亞佇遐，坐佇墓的對面。
派衛兵顧墓
27:62 隔日，就是備辦日後彼日，許個祭司長及法利賽派的人做夥去見彼拉多，
27:63 講：「大人，阮會記得彼個諞仙仔猶活啲的時曾講：『三日後，我會閣活。』
27:64 所以，請你下令嚴守墳墓到第三日，才𣍐互伊的門徒來偷提伊的身屍，煞給民眾講『伊已經對死人中閣活』。若按呢，此個最後的欺騙會比頭一遍的閣較嚴重。」
27:65 彼拉多給𪜶講：「恁導衛兵去，盡所會嚴密顧守彼個墓。」
27:66 𪜶就去，用封條封彼塊石頭，留衛兵佇遐顧守。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。