上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
害死耶穌的陰謀
26:1 ( 可 14:1-2 路 22:1-2 約 11:45-53 )
耶穌講諸個話了後給伊的門徒講：
26:2 「恁知閣兩日就是𨃟過節，人子會受出賣互人釘十字架。」
26:3 彼時，祭司長及民間的長老聚集佇大祭司該亞法的公館。
26:4 𪜶參詳欲用計謀掠耶穌，給伊害死。
26:5 毋拘𪜶講：「毋通佇節期中，驚了民眾起暴動。」
耶穌佇伯大尼受抹油
26:6 ( 可 14:3-9 約 12:1-8 )
耶穌佇伯大尼痲瘋病人西門的厝啲坐桌食飯的時，有一個婦仁人提一罐玉瓶，內面貯非常高貴的芳油，行倚來，將芳油倒佇耶穌的頭殼頂。
26:7 併於上節
26:8 門徒看著真受氣，講：「哪著即浪費？
26:9 此罐芳油會當賣真多錢來救濟散赤人。」
26:10 耶穌知影，就對𪜶講：「恁哪欲刁難此個婦仁人？伊有為著我做一項好事。
26:11 不時有散赤人及恁做夥，不過我𣍐不時及恁做夥。
26:12 伊倒芳油佇我的身軀是給我準備埋葬。
26:13 我實在給恁講，此個福音無論傳到全世界什麼所在，人攏會講起此個婦仁人所做的代誌來記念伊。」
猶大出賣耶穌
26:14 ( 可 14:10-11 路 22:3-6 )
十二使徒的一個，叫做以斯加略的猶大，去見許個祭司長，
26:15 講：「我若將耶穌交互恁，恁欲互我什麼？」𪜶就提三十個銀仔互伊。
26:16 對彼時起，猶大一直啲尋機會欲出賣耶穌。
準備𨃟過節的晚餐
26:17 ( 可 14:12-21 路 22:7-13, 21-23 約 13:21-30 )
除酵節的頭一日，門徒來問耶穌：「你愛阮佇叨位給你準備食𨃟過節的晚餐？」
26:18 耶穌講：「恁入城去尋彼個某人，給伊講：『老師講：我的時已經到，我欲及我的門徒佇你的厝守𨃟過節。』」
26:19 門徒就照耶穌的吩咐去準備𨃟過節的晚餐。
26:20 黃昏的時，耶穌及十二使徒坐桌。
26:21 𪜶啲食飯的時，耶穌講：「我實在給恁講，恁中間有一個人欲給我出賣。」
26:22 𪜶真傷心，一個一個給伊問：「主啊，毋是我乎？」
26:23 耶穌應講：「伸手及我像時提食物佇盤裡啲搵彼個人欲給我出賣。
26:24 照聖經所記載，人子會受害，不過出賣人子彼個人慘啊！彼個人寧可無出世較好。」
26:25 出賣耶穌的猶大嘛給伊問：「拉比，毋是我乎？」
耶穌應講：「這是你講的。」
主的晚餐
26:26 ( 可 14:22-26 路 22:14-20 林前 11:23-25 )
𪜶啲食的時，耶穌提餅，感謝了後擘開，分互門徒，講：「提去食；這是我的身軀。」
26:27 然後伊捧杯，感謝了後提互門徒，講：「恁攏著飲此杯，
26:28 因為這是我的血，是立約的血，為著真多人流出的，欲互𪜶的罪得著赦免。
26:29 我給恁講，佇我的父的國及恁飲新的葡萄酒彼日以前，我絕對𣍐閣飲此個酒。」
26:30 𪜶吟詩了後就出去，去橄欖山。
耶穌預言彼得毋認伊
26:31 ( 可 14:27-31 路 22:31-34 約 13:36-38 )
耶穌給𪜶講：「今暝恁攏會放拺我，因為聖經有記載：
我欲拍牧者，
歸群羊就四散。
26:32 毋拘我閣活以後會比恁先去加利利。」
26:33 彼得對耶穌講：「雖然𪜶大家攏放拺你，我絕對𣍐放拺你！」
26:34 耶穌給伊講：「我實在給你講，今暝雞啼以前，你會三遍毋認我。」
26:35 彼得應講：「若一定著及你做夥死，我嘛絕對𣍐毋認你！」
其他的門徒嘛攏按呢講。
佇客西馬尼祈禱
26:36 ( 可 14:32-42 路 22:39-46 )
後來，耶穌及門徒來到一個所在叫做客西馬尼。伊給門徒講：「我去遐祈禱，恁𫢶遮坐。」
26:37 伊就導彼得及西庇太的兩個子做夥去。伊悲傷，非常痛苦，
26:38 對𪜶講：「我心憂傷到欲死。恁𫢶遮，及我做夥警醒。」
26:39 伊行較進前，面仆落去，祈禱講：「我的父啊，若會當，求你互我免飲此個杯，毋拘毋是照我的意思，著照你的旨意實現。」
26:40 伊轉來門徒遐，看著𪜶啲睏，就對彼得講：「恁真正𣍐當及我警醒一點鐘久是無？
26:41 著警醒，著祈禱，才𣍐陷落誘惑。恁雖然心真意愛，毋拘肉體軟弱。」
26:42 耶穌第二遍閣去祈禱，講：「我的父啊，此個杯若𣍐當免，我一定著飲，願你的旨意實現。」
26:43 伊閣轉來，看著𪜶因為目睭澀猶啲睏。
26:44 耶穌閣離開𪜶，第三遍去祈禱，嘛是講像款的話。
26:45 然後伊閣轉來門徒遐，對𪜶講：「恁猶啲睏，猶啲歇睏噢？恁看，時間接近啦；人子受出賣交佇罪人的手頭啦。
26:46 起來，咱來去。恁看，出賣我的人來啦。」
耶穌受掠
26:47 ( 可 14:43-50 路 22:47-53 約 18:3-12 )
耶穌猶啲講的時，十二使徒的一個 — 猶大來，祭司長及民間的長老派來的一大陣人攑刀攑棍及伊鬥陣來。
26:48 出賣耶穌彼個人有互𪜶一個暗號，講：「我給伊唚彼個就是；恁給掠。」
26:49 猶大隨時行倚耶穌，對伊講：「拉比，平安！」就給伊唚。
26:50 耶穌給伊講：「朋友，你哪佇遮？」
許個人就倚去，下手掠耶穌。
26:51 忽然，有一個及耶穌鬥陣的人伸手拔刀對大祭司的僕人刜落去，給伊一旁的耳仔削起來。
26:52 耶穌給伊講：「刀收起來，因為攑刀的攏會死佇刀下。
26:53 你想講我𣍐當懇求我的父隨時差十二營較加的天使來是無？
26:54 我若按呢做，聖經所記載一定著發生的代誌哪會應驗？」
26:55 彼時耶穌對群眾講：「恁攑刀攑棍出來掠我，是欲掠強盜是無？我逐日佇聖殿坐啲教示人，恁無給我掠。
26:56 不過這一切的代誌攏已經實現，是欲應驗先知佇聖經所講的話。」
然後，所有的門徒攏放拺耶穌逃走。
耶穌佇議會受審
26:57 ( 可 14:53-65 路 22:54-55, 63-71 約 18:13-14, 19-24 )
許個掠耶穌的人給伊導去大祭司該亞法遐；經學教師及長老攏已經聚集佇遐。
26:58 彼得離遠遠啲隨耶穌，隨到大祭司公館的埕。伊入去內面及警衛做夥坐，欲看代誌的結局。
26:59 祭司長及全議會一直啲尋假證據欲告耶穌，通給伊處死。
26:60 雖然有真多人出來給伊誣告，毋拘𪜶攏尋無證據。後來有兩個人出來，
26:61 講：「此個人曾講『我有法度毀壞上帝的聖殿，三日內閣給伊起起來』。」
26:62 大祭司徛起來對耶穌講：「諸個人啲給你告什麼，你哪攏無答辯？」
26:63 毋拘耶穌攏恬恬。大祭司閣一遍對伊講：「我指永遠活的上帝命令你給阮講，你是基督，上帝的子抑毋是。」
26:64 耶穌應講：「你已經講啦。毋拘我給恁講，對今以後恁會看見人子坐佇全能者的正旁，坐天頂的雲來臨。」
26:65 大祭司就拆裂家己的外衫，講：「伊已經褻瀆上帝。咱猶需要什麼證人？今恁已經有聽著伊褻瀆上帝。
26:66 恁想按怎？」
𪜶應講：「伊該死！」
26:67 後來𪜶呸涎佇耶穌的面，給伊掙，閣有人給伊搧，
26:68 講：「基督啊，你是先知，給阮講看覓，啥人給你拍？」
彼得毋認耶穌
26:69 ( 可 14:66-72 路 22:56-62 約 18:15-18, 25-27 )
彼得佇公館外面的埕啲坐，有一個女婢行倚去，講：「你嘛攏有啲及彼個加利利人耶穌做夥。」
26:70 彼得佇眾人的面前毋認，講：「我毋知你啲講什麼。」
26:71 彼得行出去到大門口的時，有另外一個女婢看著伊，就給佇遐的人講：「此個人有啲及拿撒勒人耶穌做夥。」
26:72 彼得閣一遍咒誓毋認，講：「我毋識彼個人。」
26:73 過無偌久，徛佇邊仔的人倚來，對彼得講：「你確實嘛是𪜶彼陣的人，聽你的腔就知。」
26:74 伊就咒誓講：「我毋識彼個人。我若講白賊，願天責罰我！」
雞隨時啼。
26:75 彼得想著耶穌所講的話「雞啼以前，你會三遍毋認我」，就出去外面大聲啼哭。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。