上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
十個在室女的譬喻
25:1 「天國通譬喻做十個在室女攑燈出去迎接新郎。
25:2 其中有五個戇的，五個巧的。
25:3 許個戇的攑燈，無另外帶油，
25:4 毋拘巧的攑燈，有另外帶幾若罐油。
25:5 新郎較晏到，𪜶煞攏盹佝睏去。
25:6 「半暝，有人大聲喝：『新郎來啦，出來迎接！』
25:7 彼時，許個在室女攏醒起來，修整𪜶的燈。
25:8 戇的給巧的講：『阮的燈啲欲化去啦，恁的油分一寡互阮。』
25:9 巧的應講：『驚了油無夠分恁用，上好恁家己去給賣油的買。』
25:10 𪜶去買的時新郎到位，許個準備好勢的及伊入去赴婚宴，門就關起來。
25:11 「後來許個戇的在室女嘛來，講：『先生，先生，請給阮開門！』
25:12 新郎應講：『我實在給恁講，我毋識恁！』
25:13 「所以，著警醒，因為彼個日彼個時恁毋知。」
三個僕人的譬喻
25:14 ( 路 19:11-27 )
「天國親像有一個人欲出外旅行，叫家己的僕人來，將財產交代𪜶。
25:15 伊照逐人的才調交金幣互𪜶，一個五千，一個兩千，一個一千，就出外去。
25:16 彼個領五千的隨時提去做生理，閣賺五千。
25:17 像款，彼個領兩千的嘛閣賺兩千。
25:18 毋拘彼個領一千的出去，佇土腳挖一孔，給主人的金幣藏起來。
25:19 「過真久，許個僕人的主人轉來，及𪜶算賬。
25:20 彼個領五千的行進前，另外提五千來，講：『頭家，你交代我五千個金幣，請看，我有閣賺五千。』
25:21 主人給伊講：『真好，好閣忠實的僕人，你既然佇少的有忠實，我欲派你管較多的；入來及主人做夥歡喜。』
25:22 「領兩千的嘛來，講：『頭家，你交代我兩千個金幣，請你看，我有閣賺兩千。』
25:23 主人給伊講：『真好，好閣忠實的僕人，你既然佇少的有忠實，我欲派你管較多的；入來及主人做夥歡喜。』
25:24 「此時，彼個領一千的嘛行進前，講：『頭家，我知你是嚴轄的人，無撒種嘛欲收割，無種作嘛欲收成。
25:25 我真驚，才將你的金幣提去藏佇土腳底。今你的金幣還你。』
25:26 「主人應講：『歹閣貧憚的僕人，你既然知我無撒種嘛欲收割，無種作嘛欲收成，
25:27 你應該將我的金幣寄銀行，我轉來的時通連本帶利收回。』
25:28 給伊的金幣提來，交互有一萬金幣彼個人。
25:29 因為有的，欲互伊閣較多，甚至有賰；無的，連伊所有的嘛欲給伊搶起來。
25:30 此個無路用的僕人，給伊趕出去外面烏暗的所在；佇遐伊會啼哭，咬牙切齒。」
最後的審判
25:31 「人子作王導眾天使來臨的時，伊會坐佇榮耀的寶座。
25:32 地上萬民攏會聚集佇伊的面前。伊會將𪜶分做兩旁，親像牧者將綿羊及山羊分開；
25:33 給綿羊安排佇正旁，山羊佇倒旁。
25:34 後來，王會給正旁的人講：『來，恁諸個受我的父祝福的，來承受對創造宇宙以來就為著恁準備的國度。
25:35 因為我枵，恁有互我食；我嘴焦，恁有互我飲；我作出外人，恁有給我收留；
25:36 我赤身露體，恁有互我穿；我破病，恁有給我照顧；我佇監裡，恁有來探我。』
25:37 「彼時，義人會應伊講：『主啊，什麼時阮看著你枵有互你食，嘴焦有互你飲？
25:38 什麼時阮看著你作出外人有給你收留，赤身露體有互你穿？
25:39 什麼時阮看著你破病抑是佇監裡，阮有去探你？』
25:40 王會應講：『我實在給恁講，恁有按呢對待我兄弟姊妹上微細的一個，就是好款待我。』
25:41 「後來，王會給倒旁的人講：『恁諸個受咒詛的人，離開我，入去為著魔鬼及伊的使者所準備永遠的火裡。
25:42 因為我枵，恁無互我食；我嘴焦，恁無互我飲；
25:43 我作出外人，恁無給我收留；我赤身露體，恁無互我穿；我破病抑是佇監裡，恁無來探我。』
25:44 「彼時，𪜶嘛會應講：『主啊，什麼時阮看著你枵，嘴焦，作出外人，赤身露體，破病，抑是佇監裡，無給你照顧？』
25:45 王會給𪜶講：『我實在給恁講，恁無按呢對待上微細的一個，就是無好款待我。』
25:46 諸個人會受永遠的刑罰，總是義人會得著永遠的活命。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。