上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
什麼人上大
18:1 ( 可 9:33-37 路 9:46-48 )
彼時，門徒來問耶穌：「佇天國什麼人上大？」
18:2 耶穌叫一個囝仔來，互伊徛佇𪜶中間，
18:3 講：「我實在給恁講，恁若無改變變做親像囝仔，絕對𣍐當入天國。
18:4 所以，人家己謙卑親像此個囝仔，此個人佇天國就是上大。
18:5 無論什麼人，為著我的名接納此款囝仔就是接納我。」
引起人犯罪
18:6 ( 可 9:42-48 路 17:1-2 )
「無論什麼人互信我的人中間微細的一個犯罪，寧可互人用大石磨縛佇頷頸填落深海。
18:7 此個世間慘啊，因為有互人跋倒犯罪。互人犯罪的事一定有，毋拘引起人犯罪的人慘啊。
18:8 「你的一支手抑是一支腳若互你犯罪，著給伊斬起來擲㧒确。寧可一腳一手入永遠活，比雙腳雙手好好互人㧒落永遠的火較好。
18:9 你的目睭若互你犯罪，著給伊挖出來擲㧒确。寧可減一蕊目睭入永遠活，比兩蕊目睭好好，互人㧒落火啲𤏸的地獄較好。」
失迷的羊的譬喻
18:10 ( 路 15:3-7 )
「恁著謹慎，毋通看輕諸個微細的人的一個。我給恁講，𪜶的天使佇天頂時常啲見我天父的面。
18:12 「恁想啥款？有一個人有一百隻羊，其中一隻失迷，伊豈𣍐將九十九隻放佇山頂，去尋彼隻失迷的？
18:13 我實在給恁講，伊若尋著彼隻失迷的羊，一定真歡喜，比有九十九隻無失迷的閣較歡喜。
18:14 像款，恁的天父毋甘諸個微細的人的一個滅亡。」
按怎對待得罪你的人
18:15 「你的兄弟抑是姊妹若得罪你，著去尋伊，干焦恁兩人做夥的時私下給伊指出錯誤。伊若欲聽，就回復你及伊做兄弟抑是姊妹的關係。
18:16 伊若毋聽，著導一兩個人及你去，按呢逐句話有兩個抑是三個人通作證。
18:17 伊若猶毋聽，著給教會講；伊若連教會都毋聽，就給伊看做外邦人抑是貿稅的。」
禁止及允准
18:18 「我實在給恁講，恁佇地上禁止的，佇天頂嘛會禁止；恁佇地上允准的，佇天頂嘛會允准。
18:19 「我閣給恁講，恁中間若有兩個人佇地上同心合意祈求，我的天父攏會給𪜶成全。
18:20 因為，有兩個抑是三個人奉我的名聚會，我就佇𪜶中間。」
毋赦免人的僕人的譬喻
18:21 彼得來問耶穌：「主啊，我的兄弟抑是姊妹得罪我，我著赦免伊幾遍？到七遍是無？」
18:22 耶穌給伊講：「毋是。我毋是給你講著到七遍，是著到七十個七遍。
18:23 「按呢，天國通用此個譬喻來說明：有一個國王欲及伊的僕人結賬，
18:24 伊開始算賬的時，有人將欠幾若百萬銀仔的人導來伊的面前。
18:25 彼個人𣍐當還，主人就命令人將彼個人及伊的某子以及一切所有的攏去賣來還債。
18:26 彼個僕人就跪落去求講：『請互我限一下，我會攏還。』
18:27 僕人的主人就可憐伊，擦消伊的債，放伊去。
18:28 「彼個僕人出去，抵著一個平平做僕人的，彼個人只有欠伊幾個銀仔，就給伊掠啲，掟伊的頷頸，講：『你所欠的，攏著還！』
18:29 平平做僕人的跪落去求伊講：『拜託互我限一下，我會攏還。』
18:30 伊毋肯，顛倒將此個人關落監，關到所欠的攏還清楚。
18:31 另外平平做僕人的看著，非常痛心，就將所發生一切的代誌去給主人報告。
18:32 主人就叫彼個僕人來，對伊講：『你此個歹僕人，因為你對我求，我就將你所欠的債攏擦消。
18:33 我有憐憫你，你豈毋應該親像按呢憐憫彼個平平做僕人的？』
18:34 伊的主人真受氣，就給伊關落監受刑，關到伊將一切的債務攏還清楚。
18:35 「恁逐個人若無對心底赦免家己的兄弟抑是姊妹，我的天父嘛會按呢對待恁，𣍐給恁赦免。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。