上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌改變形像
17:1 ( 可 9:2-13 路 9:28-36 )
六日後，耶穌導彼得、雅各，及雅各的小弟約翰，干焦𪜶家己𬦰上一座高山。
17:2 佇𪜶面前，耶穌的形像改變：伊的面親像日頭發光；伊的衫變甲親像光赫呢白。
17:3 忽然間，摩西及以利亞對𪜶顯現，及耶穌講話。
17:4 彼得對耶穌講：「主啊，咱佇遮真好！你若欲，我佇遮搭三間寮仔，一間互你，一間互摩西，一間互以利亞。」
17:5 伊猶啲講的時，忽然有一片燦爛的雲給𪜶罩咧，有聲對雲出來，講：「此個是我所疼的子，伊，我真意愛，恁著聽趁伊。」
17:6 門徒一下聽著就仆落去，非常驚惶。
17:7 耶穌行倚去，給𪜶摸，講：「起來，毋免驚！」
17:8 𪜶一下攑目看，只有看著耶穌，以外無別人。
17:9 𪜶落山的時，耶穌命令𪜶，講：「人子對死人中閣活以前，恁毋通給人講起所看見的異象。」
17:10 門徒問伊，講：「若按呢，是按怎經學教師講以利亞一定著先來？」
17:11 耶穌應講：「以利亞一定著來重新整理一切。
17:12 我給恁講，以利亞已經來啦，毋拘人毋識伊，反轉照𪜶的意思對待伊。親像按呢，人子嘛啲欲佇𪜶的手下受苦。」
17:13 彼時門徒才明白伊對𪜶講的是指施洗者約翰。
耶穌醫好邪神附身的囝仔
17:14 ( 可 9:14-29 路 9:37-43 )
𪜶來到群眾遐，有一個人來，跪佇耶穌的腳前，
17:15 對伊講：「主啊，憐憫我的子！因為伊致著羊眩，非常艱苦，不時跋落火，嘛不時跋落水。
17:16 我導伊去你的門徒遐，𪜶無法度給伊醫好。」
17:17 耶穌應講：「唉啊，毋信閣腐敗的世代，我著及恁住偌久？我著閣忍耐恁偌久？給伊導來我遮。」
17:18 耶穌責備鬼，鬼就對囝仔出去；伊的病隨時好去。
17:19 後來，門徒私下來問耶穌：「是按怎阮無法度給鬼趕出去？」
17:20 耶穌給𪜶講：「是因為恁小信。我實在給恁講，恁的信心若有芥菜籽赫大，恁對此座山講『對遮徙去遐』，山嘛會徙去；無一項事恁做𣍐到。」
耶穌閣預告家己的死及閣活
17:22 ( 可 9:30-32 路 9:43-45 )
門徒聚集佇加利利的時，耶穌給𪜶講：「人子啲欲互人出賣。
17:23 𪜶會給伊害死，第三日上帝會互伊閣活。」門徒就非常傷心。
納聖殿稅
17:24 耶穌及門徒來到迦百農的時，有一寡收聖殿稅的人去問彼得：「恁老師有納聖殿稅無？」
17:25 伊講：「有。」
彼得入去厝內的時，耶穌先問伊講：「地上的君王是對什麼人收關稅抑是人頭稅？是對本國人抑是外國人？西門，你想按怎？」
17:26 彼得應講：「對外國人。」
耶穌給伊講：「按呢，本國人就毋免納稅囉。
17:27 不過，咱為著無愛得罪諸個人，你去湖裡釣魚，釣起來的頭一尾，給魚的嘴擘開就會看著一個銀仔，提去互𪜶，替我及你納聖殿稅。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。