上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
安歇日的問題
12:1 ( 可 2:23-28 路 6:1-5 )
過無偌久，佇安歇日耶穌對麥園經過。伊的門徒腹肚枵，就摘麥穗來食。
12:2 法利賽派的人看著，對耶穌講：「你看，你的門徒佇安歇日做𣍐用得做的代誌。」
12:3 耶穌給𪜶講：「恁豈毋曾讀著大闢及隨伊的人腹肚枵的時所做的代誌？
12:4 伊入去上帝的殿食獻祭的餅，此款餅只有祭司才通食，伊及隨伊的人攏𣍐用得食。
12:5 另外，恁豈無讀著律法的記載，就是安歇日祭司佇聖殿犯著安歇日的規矩嘛算無罪。
12:6 我給恁講，佇遮有一個比聖殿較重要的。
12:7 聖經有講：『我愛憐憫，無愛祭物。』恁若了解此句話的意思，就𣍐給無罪的人定罪。
12:8 因為人子是安歇日的主。」
耶穌醫好手瘸去的人
12:9 ( 可 3:1-6 路 6:6-11 )
耶穌離開彼所在，入去𪜶的會堂。
12:10 抵好有一個一支手瘸去的人佇遐。有一寡人想欲控告耶穌，就問伊講：「佇安歇日醫病有合律法無？」
12:11 耶穌應講：「恁中間有人有一隻羊，抵好佇安歇日跋落窟仔，伊豈𣍐給伊扭起來？
12:12 人比羊加偌仔呢貴重！所以，佇安歇日做好事有合律法。」
12:13 耶穌就給彼個人講：「手伸出來！」
此個人手伸出來，就復原，完全好去，及另外彼支手仝款。
12:14 法利賽派的人出去，就計謀欲對付耶穌，看欲按怎給伊害死。
上帝揀選的僕人
12:15 耶穌知影𪜶的計謀就離開遐；有真多人隨伊去，伊就醫好𪜶中間所有的病人。
12:16 伊命令𪜶毋通對人傳揚伊的代誌。
12:17 這是欲應驗通過先知以賽亞所講的話：
12:18 恁看，我所揀選的僕人，
我所疼，所意愛的。
我欲賜我的神互伊；
伊欲對萬民宣告我的公義。
12:19 伊𣍐爭辯，𣍐喧嚷；
佇街路無人會聽著伊的聲。
12:20 受傷的蘆葦，伊𣍐遏斷；
欲化的燈火，伊𣍐歕熄，
直到伊互公義得勝。
12:21 萬民攏會將向望交託伊。
耶穌及別西卜
12:22 ( 可 3:20-30 路 11:14-23 12:10 )
彼時，有人導一個互鬼附身，失明閣𣍐講話的人來耶穌遐；耶穌給伊醫好，彼個𣍐講話的人就會講話，閣會看見。
12:23 群眾攏真著驚，講：「此個人敢是大闢的子乎？」
12:24 法利賽派的人聽著就講：「此個人是靠鬼王別西卜啲趕鬼。」
12:25 耶穌知影𪜶的心思就給𪜶講：「國家家己紛爭，會荒廢；城市抑是家庭家己紛爭，徛𣍐牢。
12:26 撒旦若趕撒旦，是家己紛爭，伊的國欲哪徛會牢？
12:27 我若靠別西卜趕鬼，恁的子弟是靠什麼人趕鬼？按呢，恁家己的子弟會給恁判罪。
12:28 不過我若是靠上帝的神趕鬼，上帝的主權就已經佇恁中間實現啦。
12:29 「人按怎才會當入去勇士的厝搶伊的財物，豈毋是著先給伊縛起來？
12:30 「無為我的就是反對我；無及我做夥收集的就是啲拍散。
12:31 所以，我給恁講，人一切的罪及誹謗攏會得著赦免，毋拘褻瀆聖神𣍐得著赦免。
12:32 無論什麼人講話攻擊人子，會得著赦免，毋拘無論什麼人講話攻擊聖神，佇現在及將來攏𣍐得著赦免。」
樹及果子
12:33 ( 路 6:43-45 )
「好樹結好果子；歹樹結歹果子；對所結的果子通知樹的好歹。
12:34 恁諸個毒蛇，恁本來是歹的，欲哪會講好話？因為人心內充滿什麼，嘴就講什麼。
12:35 好人對所積聚的好發出好；歹人對所積聚的歹發出歹。
12:36 「我給恁講，人所講一切的閒仔話，佇審判的日逐句攏著負責。
12:37 因為上帝欲用你的話來判你無罪，嘛欲用你的話來定你有罪。」
要求神跡
12:38 ( 可 8:11-12 路 11:29-32 )
彼時，有幾若個經學教師及法利賽派的人對耶穌講：「老師，阮愛你行一個神跡互阮看。」
12:39 耶穌應講：「邪惡姦淫的世代要求神跡，毋拘先知約拿的神跡以外，𣍐閣有神跡互𪜶。
12:40 親像約拿三暝三日佇大魚的腹肚內，人子嘛會三暝三日佇地深的所在。
12:41 佇審判的時，尼尼微人會及此世代的人做夥起來，給此世代的人定罪，因為尼尼微人聽著約拿的傳道了後攏有悔改。恁看，有比約拿閣較偉大的佇遮！
12:42 佇審判的時，南方的女王會及此世代的人做夥起來，給此世代的人定罪，因為伊有對地的極頭來聽所羅門智慧的話。恁看，有比所羅門閣較偉大的佇遮！」
邪神倒轉去
12:43 ( 路 11:24-26 )
「邪神離開所附身的人了後，佇無水的地區行透透，欲尋一個歇睏的所在，尋攏無，
12:44 就講：『我欲轉來去我出來彼間厝。』伊轉去，看著厝空空，掃甲真清氣，閣整理好勢。
12:45 後來，伊去導七個比伊較歹的邪神及伊做夥來，入去遐住。按呢，彼個人的結局比起頭閣較慘。此個邪惡的世代嘛會親像按呢。」
耶穌的老母及兄弟
12:46 ( 可 3:31-35 路 8:19-21 )
耶穌猶啲對眾人講話的時，伊的老母及兄弟來徛佇外面，愛欲及伊講話。
12:47 有人給耶穌講：「你看，你的老母及兄弟徛佇外面，愛欲及你講話。」
12:48 耶穌給彼個人講：「什麼人是我的老母？什麼人是我的兄弟？」
12:49 然後伊伸手指伊的門徒講：「恁看，我的老母，我的兄弟！
12:50 實行我天父旨意的人就是我的兄弟、姊妹，及老母。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。