上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌設立十二使徒
10:1 ( 可 3:13-19 路 6:12-16 )
耶穌召集伊十二個門徒來，互𪜶有權柄通趕邪神，醫治逐款的症頭及病疼。
10:2 此十二使徒的名就是諸個：第一是西門，嘛叫做彼得，及伊的小弟安得烈；西庇太的子雅各及伊的小弟約翰；
10:3 腓力及巴多羅買；多馬及貿稅的馬太；達太及亞勒腓的子雅各；
10:4 激進黨的西門及出賣耶穌彼個以斯加略的猶大。
十二使徒的使命
10:5 ( 可 6:7-13 路 9:1-6 )
耶穌差此十二使徒出去，吩咐𪜶講：「恁毋通去外邦人的地區；毋通進入撒馬利亞人的城，
10:6 只有著去尋以色列家失迷的羊。
10:7 恁去的時著宣揚講：『天國啲欲實現啦！』
10:8 恁著醫好破病的人，互死人閣活，互痲瘋病人清氣，閣趕出邪神。恁白白得著，嘛著白白互人。
10:9 腰帶內面毋免帶金幣、銀幣，抑是銅幣；
10:10 出門毋免帶旅行袋抑是兩領內衫，嘛毋免帶涼鞋抑是攑柺仔；因為工人得著食物是應該。
10:11 「恁無論入去叨一個城叨一個庄社，著探聽看什麼人願意接待恁，才去住遐，住到離開。
10:12 恁入去厝內的時，著給𪜶請安。
10:13 此家的人若願意接待恁，著將恁的平安互𪜶；若無願意接待恁，著將平安收回。
10:14 毋接待恁，毋聽恁的話的人，恁離開彼間厝抑是彼個城的時，著將恁腳裡的土粉拌互伊清氣。
10:15 我實在給恁講，佇審判的日，所多瑪及蛾摩拉地區所受的刑罰會比彼個城所受的閣較好忍受。」
啲欲來的迫害
10:16 ( 可 13:9-13 路 21:12-19 )
「著知，我差恁出去，親像送羊入去豺狼的中間。所以，著親像蛇赫呢靈巧，親像粉鳥赫呢馴良。
10:17 恁著持防，因為有人會給恁掠去交互議會，佇𪜶的會堂用鞭給恁拍。
10:18 閣為著我的緣故，恁會互人拖到總督及君王的面前，來對𪜶及外邦人做見證。
10:19 毋拘，恁互人掠去審問的時，毋免煩惱欲按怎講，抑是欲講什麼；彼時恁所著講的，會給恁指示，
10:20 因為啲講的毋是恁家己，是恁天父的神通過恁啲講。
10:21 「兄弟會出賣兄弟，互伊死；老父嘛會按呢對待子兒。子兒會起來攻擊父母，給𪜶害死。
10:22 恁會因為我的名互眾人怨恨，毋拘忍耐到最後的會得著救。
10:23 𪜶佇此個城迫害恁，著逃走去別個城。我實在給恁講，以色列的城市恁行猶未透，人子就來！
10:24 「學生𣍐超過老師；僕人嘛𣍐超過主人。
10:25 學生抵著的迫害及老師仝款，僕人抵著的及主人仝款，按呢就有夠。人都給此家的主人叫做別西卜，何況伊家內的人。」
人應該驚的是上帝
10:26 ( 路 12:2-7 )
「所以，毋免驚𪜶；因為無一項掩蓋的𣍐露現；嘛無一項祕密的𣍐互人知。
10:27 我佇暗中給恁講的，恁著佇光明中講出來；恁佇耳孔邊聽著的，著佇厝尾頂宣布。
10:28 會害死身軀卻𣍐害死靈魂的，恁毋免驚；顛倒著驚會將靈魂及身軀㧒落地獄毀滅的上帝。
10:29 兩隻雀鳥仔豈毋是賣一角銀若定？恁的天父若無允准，連一隻都𣍐跋落地。
10:30 恁咧，連恁的頭毛都攏有算過。
10:31 所以，毋免驚，恁比歸群雀鳥仔閣較貴重！」
公開宣認基督
10:32 ( 路 12:8-9 )
「所以，佇人的面前宣認我的，我佇我天父的面前嘛會認伊。
10:33 佇人的面前毋認我的，我佇我天父的面前嘛毋認伊。」
毋是和平，是刀劍
10:34 ( 路 12:51-53 14:26-27 )
「毋通想講我來是欲帶和平互地上；我帶來的毋是和平，是刀劍。
10:35 因為我來是欲互人分裂：
人對抗老父，
查某子對抗老母，
新婦對抗大家。
10:36 人的對敵是家己家內的人。
10:37 「疼父母贏過疼我的，無資格隨我；疼子抑是查某子贏過疼我的，無資格隨我。
10:38 毋夯家己的十字架來隨我的，嘛無資格隨我。
10:39 欲得著家己的性命的，會喪失性命；為著我喪失家己的性命的，會得著性命。」
報賞
10:40 ( 可 9:41 )
「接納恁的就是接納我；接納我的就是接納差我來彼位。
10:41 接納先知做先知的，會得著先知應得的報賞；接納義人做義人的，會得著義人應得的報賞。
10:42 我實在給恁講，無論什麼人，干焦提一杯冷水互諸個上微細的一個飲，因為上微細的是我的門徒，此個人一定會得著報賞。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。