上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
耶穌醫好痲瘋病人
8:1 ( 可 1:40-45 路 5:12-16 )
耶穌對山頂落來的時，有歸大陣的人隨伊。
8:2 抵彼時，有一個痲瘋病人行倚來，跪落去伊的面前，講：「主啊，你若肯，會當互我清氣。」
8:3 耶穌伸手給伊摸，講：「我肯，互你清氣！」伊的痲瘋病隨時清氣。
8:4 耶穌給伊講：「著注意，攏毋通給人講。不過著去互祭司驗，閣照摩西的規定獻禮物，通對眾人證明。」
耶穌醫好羅馬軍官的僕人
8:5 ( 路 7:1-10 約 4:43-54 )
耶穌入去迦百農的時，有一個羅馬軍官行倚來給伊懇求，
8:6 講：「主啊，我的僕人半身不遂倒佇厝內，非常艱苦。」
8:7 耶穌給伊講：「我來去給伊醫治。」
8:8 軍官應講：「主啊，你來阮兜，我𣍐堪得。你干焦講一句話，我的僕人就會好。
8:9 因為我是互人管的人，嘛有兵互我管。我給此個講『去』，伊就去；給別個講『來』，伊就來；給我的僕人講『你做此個』，伊就去做。」
8:10 耶穌聽了感覺真意外，就對許個隨伊的人講：「我實在給恁講，連佇以色列人的中間，我都猶毋曾看著此款的信心。
8:11 我給恁講，有真多人會對東對西來及亞伯拉罕、以撒、雅各佇天國坐桌。
8:12 不過許個本來是天國的子兒的，反轉會受趕出去外面烏暗的所在，佇遐啼哭，咬牙切齒。」
8:13 然後耶穌對彼個軍官講：「你去，互你所信的實現！」
抵抵彼時，僕人的病就好去。
耶穌醫好真多病人
8:14 ( 可 1:29-34 路 4:38-41 )
耶穌入去彼得𪜶兜，看著伊的丈姆發熱，倒佇眠床。
8:15 耶穌摸伊的手，熱退去，伊就起來侍候伊。
8:16 黃昏的時，有一寡人導真多互邪神附身的人來耶穌遐。伊用一句話就給邪神攏趕出去，閣醫好所有的病人。
8:17 這是欲應驗通過先知以賽亞所講的話：
伊承受咱的軟弱，
擔當咱的病疼。
欲隨耶穌的人
8:18 ( 路 9:57-62 )
耶穌看著一大陣人圍佇伊周圍，就吩咐門徒過去湖的彼旁岸。
8:19 有一個經學教師行倚來給伊講：「老師，你無論去叨位，我攏欲隨你。」
8:20 耶穌應講：「狐狸有孔，空中的鳥有巢，不過人子連靠頭殼的所在都無。」
8:21 另外一個門徒給耶穌講：「主啊，聽候阮序大人百歲年老，我就來隨你。」
8:22 耶穌應講：「來隨我，互死人去埋葬𪜶家己的死人！」
耶穌平靜風湧
8:23 ( 可 4:35-41 路 8:22-25 )
耶穌上船，伊的門徒隨伊去。
8:24 忽然，湖起大風湧，船煞互湧蓋甲欲沉落去，毋拘耶穌啲睏。
8:25 門徒去給伊叫醒，講：「主啊，救咧噢，咱啲欲無命囉！」
8:26 耶穌對𪜶講：「小信的人，恁哪即無膽？」伊就起來，責備風及湧，湖就靜靜靜。
8:27 許個人著驚講：「此個是什麼款人，連風及湧都順服！」
兩個互鬼附身的人
8:28 ( 可 5:1-20 路 8:26-39 )
耶穌過去湖的彼旁岸，到加大拉人的地區，有兩個互鬼附身的人對墓仔埔出來，抵著伊。𪜶雄介介，所以無人敢對彼條路經過。
8:29 𪜶忽然大聲喝：「上帝的子，你插阮！時猶未到，你就來欲給阮苦楚是無？」
8:30 彼時，離𪜶有赫遠啊的所在，有一大群豬啲討食。
8:31 鬼求耶穌講：「你若欲給阮趕出去，著差阮進入彼群豬。」
8:32 耶穌給𪜶講：「恁去！」鬼就出去，進入豬群；忽然歸群豬攏對山坪闖落去湖裡，死佇水內。
8:33 飼豬的人就逃走，走入去城內，將一切所發生以及互鬼附身的人所抵著的代誌攏報人知。
8:34 全城的人攏出來欲看耶穌；𪜶一下看著伊，就懇求伊離開𪜶的地區。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。