上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
賑濟
6:1 「著謹慎，毋通為著欲互人看才故意佇人的面前展恁的敬虔；按呢做𣍐當對恁的天父得著報賞。
6:2 「所以，你賑濟的時，毋通先歕喇叭報人知，親像假好的人佇會堂及街路按呢做，愛互人謳咾。我實在給恁講，𪜶已經得著𪜶的報賞啦。
6:3 你賑濟的時，毋通互你的倒手知正手的所做，
6:4 互你通恬恬仔賑濟，恬恬仔啲看的你的父會給你報賞。」
祈禱
6:5 ( 路 11:2-4 )
「恁祈禱的時，毋通親像假好的人，因為𪜶愛互人看，故意徛佇會堂抑是路口祈禱。我實在給恁講，𪜶已經得著報賞啦。
6:6 你祈禱的時，著入去房間內，關門，對你恬恬仔啲看的父求，按呢恬恬仔啲看的你的父會給你報賞。
6:7 「恁祈禱的時，毋通親像外邦人講了閣講，因為𪜶想，講較多話上帝才會聽見。
6:8 恁毋通及𪜶像款；因為猶未求以前，恁的父已經知恁的需要。
6:9 所以，恁著按呢祈禱：
阮的天父：
願你的聖名受尊崇。
6:10 願你施行主權；
願你的旨意實現，
佇地上親像佇天頂。
6:11 求你今仔日賜阮需要的食物。
6:12 求你赦免阮的辜負，
親像阮嘛有赦免辜負阮的人。
6:13 求你毋通互阮陷落擔當𣍐起的試探，
救阮脫離彼個邪惡者。
6:14 「恁若赦免人的過失，恁的天父嘛會赦免恁；
6:15 恁若無赦免人，恁的天父嘛𣍐赦免恁的過失。」
禁食
6:16 「恁禁食的時，毋通親像假好的人憂頭結面；因為𪜶故意互面歹看，愛互人看出𪜶啲禁食。我實在給恁講，𪜶已經得著報賞啦。
6:17 你禁食的時，頭毛著抹油，面著洗，
6:18 互人看𣍐出你啲禁食，只有互恬恬仔啲看的父看見，按呢恬恬仔啲看的你的父會給你報賞。」
天頂的財寶
6:19 ( 路 12:33-34 )
「毋通為著家己積聚財寶佇地上，佇遮有蟲咬，會生銹，賊會挖孔偷提。
6:20 著為著家己積聚財寶佇天頂，佇遐無蟲咬，𣍐生銹，無賊挖孔偷提。
6:21 因為你的財寶佇叨位，你的心嘛會佇遐。」
身軀的光
6:22 ( 路 11:34-36 )
「目睭是身軀的燈。你的目睭若金，歸身軀就光明；
6:23 你的目睭若花，歸身軀就烏暗。按呢，你內面的光若變做暗，此個烏暗是偌仔呢嚴重！」
上帝抑是財富
6:24 ( 路 16:13 12:22-31 )
「無人會當服事兩個主人；伊若毋是怨恨此個，疼彼個，就是看重此個，看輕彼個。恁𣍐當像時服事上帝閣服事錢財。
6:25 「所以，我給恁講，毋通為著恁的性命欲食什麼，欲飲什麼啲操煩；嘛毋通為著恁的身軀欲穿什麼啲操煩。性命豈毋是比食物較重要？身軀豈毋是比衣服較重要？
6:26 恁看空中的飛鳥，𪜶無種作，無收成，嘛無囤積糧食佇倉庫，恁的天父嘛啲給𪜶養飼。恁豈無比𪜶較貴重？
6:27 恁豈有人想講操煩會當互家己的性命加活一時仔久？
6:28 「恁哪著因為欲穿什麼操煩？恁想看山野的花按怎啲大欉；𪜶無勞苦，嘛無紡織。
6:29 不過我給恁講，連所羅門上榮華的時，伊穿的衫都無比諸個花的一蕊閣較媠。
6:30 山野的花草今仔日啲活，明仔載互人㧒落火爐，上帝都按呢給𪜶妝飾，伊豈𣍐閣較給恁妝飾？恁哪即呢無信心！
6:31 「所以，恁毋免操煩講『阮欲食什麼』抑是『阮欲飲什麼，欲穿什麼』。
6:32 諸個攏是外邦人啲追求的。恁的天父知諸個攏是恁所需要的。
6:33 著先追求伊的主權及伊的旨意實現，諸個物件就會攏續互恁。
6:34 所以，毋通為著明仔載操煩；明仔載的代誌明仔載才操煩。一日的艱苦一日當。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。