上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
5:1 山頂的教示
耶穌看著一大陣人，就𬦰上山。伊坐落去，門徒倚來，
5:2 就開始教示𪜶，講：
真有福氣
5:3 ( 路 6:20-23 )
「心靈散赤的人真有福氣，
因為天國是此款人的。
5:4 憂傷的人真有福氣，
因為上帝會給𪜶安慰。
5:5 溫柔的人真有福氣，
因為上帝會互𪜶承受應允的土地。
5:6 枵嘴焦欣慕上帝旨意實現的人真有福氣，
因為上帝會互𪜶飽足。
5:7 𠢕憐憫的人真有福氣，
因為上帝會給𪜶憐憫。
5:8 心清氣的人真有福氣，
因為𪜶會見著上帝。
5:9 促進和平的人真有福氣，
因為𪜶會成做上帝的子兒。
5:10 為著實踐上帝的旨意受迫害的人真有福氣，
因為天國是此款人的。
5:11 「為著我的緣故，人給恁侮辱，迫害，講逐款歹話誹謗，恁真有福氣。
5:12 著歡喜快樂，因為恁佇天頂的報賞真大；恁以前的先知嘛曾按呢受迫害。」
鹽及光
5:13 ( 可 4:21 9:50 路 14:34-35 )
「恁是地上的鹽；鹽若失味，欲按怎互伊閣鹹？鹽失味就無路用，只有挕拺，互人踐踏。
5:14 「恁是世間的光。起佇山頂的城蓋𣍐牢。
5:15 人點燈了後𣍐用斗給伊蓋起來，一定會給伊𫞼佇燈台頂，通給厝內所有的人照光。
5:16 親像按呢，恁的光著照佇人的面前，通互𪜶看見恁的好行為來榮光恁的天父。」
律法
5:17 「毋通想講我來是欲廢除摩西的律法抑是先知的教示。我來毋是欲廢除，是欲實現。
5:18 我實在給恁講，天及地會消失，律法的一點一劃絕對𣍐消失，攏會實現。
5:19 所以，無論什麼人犯著諸個誡命上細的一條，閣教人按呢去犯，佇天國伊算做是上細的。無論什麼人家己遵守，嘛教人遵守，佇天國此個人算做是上大的。
5:20 我給恁講，恁若無比經學教師及法利賽派的人閣較忠實遵守上帝的旨意，絕對𣍐當入天國。」
受氣
5:21 「恁有聽著律法按呢教示古早人，講：『毋通害死人；害死人的著受審判。』
5:22 毋拘我給恁講，對兄弟抑是姊妹發受氣，攏著受審判。無論什麼人罵兄弟抑是姊妹『廢人』，著上法庭；罵兄弟抑是姊妹『倲戇』，著受地獄的火燒。
5:23 所以，你佇祭壇欲獻禮物的時，若想著你的兄弟抑是姊妹對你有不滿，
5:24 著將禮物放下佇祭壇前，先去及伊和好，然後才來獻禮物。
5:25 「人給你控告，欲拖你去法庭，猶佇路中的時著趕緊及伊和解，才免互控告你的人給你交互判官，判官給你交互法警去關監。我實在給你講，最後的一仙五釐無還清楚，你絕對𣍐當出監。」
5:26 併於上節
姦淫
5:27 「恁有聽著律法按呢教示講：『毋通姦淫。』
5:28 毋拘我給恁講，人若用邪念看婦女，已經佇心內犯姦淫。
5:29 你的正目若引起你犯罪，著給伊挖㧒确，寧可失去身軀的一部份，比歸身軀好好㧒落地獄較好。
5:30 你的正手若引起你犯罪，著給伊斬㧒确，寧可失去身軀的一部份，比歸身軀好好㧒落地獄較好。」
離婚
5:31 ( 太 19:9 可 10:11-12 路 16:18 )
「閣有律法按呢講：『人若欲離伊的某，著互伊離婚書。』
5:32 毋拘我給恁講，若毋是因為某不貞，毋通給伊離，因為伊若閣去嫁就是害伊犯姦淫；娶此個離婚的婦女的人嘛是犯姦淫。」
咒誓
5:33 「恁閣有聽著律法按呢教示古早人，講：『毋通違背所下的願，佇主面前下願著實行。』
5:34 毋拘我給恁講，攏毋通咒誓。毋通指天咒誓，因為天是上帝的寶座；
5:35 嘛毋通指地咒誓，因為地是上帝的腳砧；嘛毋通指耶路撒冷咒誓，因為耶路撒冷是大君王的城。
5:36 嘛毋通指你的頭殼咒誓，因為你𣍐當互一支頭毛變烏抑是變白。
5:37 恁講話，是，就講是，毋是，就講毋是；其他加講的是對邪惡者出來的。」
報復
5:38 ( 路 6:29-30 )
「恁有聽著律法按呢教示講：『目睭賠目睭；嘴齒賠嘴齒。』
5:39 毋拘我給恁講，毋通抵抗作惡的人。人若搧你正旁的嘴䩃，連倒旁嘛越互伊搧。
5:40 人若告你，欲提你的內衫，連外衫嘛互伊。
5:41 佔領軍的軍人若強迫你行一里路，著及伊行兩里。
5:42 人若對你求，著互伊；給你借，毋通拒絕。」
疼對敵
5:43 ( 路 6:27-28, 32-36 )
「恁有聽著此款教示：『著疼你的厝邊，怨恨你的對敵。』
5:44 毋拘我給恁講，著疼恁的對敵，替迫害恁的人祈禱。
5:45 按呢，恁才會當成做恁天父的子兒，因為伊互日頭出來照歹人及好人，嘛落雨互義人及不義的人。
5:46 因為恁若干焦疼許個疼恁的人，有什麼報賞？豈毋是連許個貿稅的嘛按呢做？
5:47 恁若只有對家己的兄弟抑是姊妹請安，有什麼比別人較特別？豈毋是連外邦人嘛按呢做？
5:48 既然恁的天父是完全，恁嘛著完全。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。