上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
星象家來訪問
2:1 希律作王的時，耶穌佇猶太的伯利恆出世。有幾若個星象家對東方來到耶路撒冷。
2:2 𪜶問講：「彼個出世做猶太人的王的佇什麼所在？阮有看著伊的星出現，專工來欲拜伊。」
2:3 希律王聽著，心內著急不安；耶路撒冷全城的人嘛是按呢。
2:4 伊就召集所有的祭司長及民間的經學教師，問𪜶講：「基督應該佇什麼所在出世？」
2:5 𪜶應講：「猶太的伯利恆。因為先知有按呢記載：
2:6 猶大地區的伯利恆啊，
你佇猶大城市中毋是上微細的；
因為有一個領袖會對你遐出來，
伊欲牧養我的子民以色列。」
2:7 希律就暗中召彼幾個星象家，詳細給𪜶問彼粒星什麼時出現。
2:8 後來，伊差𪜶去伯利恆，講：「恁去詳細查問關係此個細漢囝仔的事；尋著，著來報我知，我嘛通去拜伊。」
2:9 𪜶聽王的話就去。𪜶佇東方看著的彼粒星做頭導𪜶，來到彼個細漢囝仔的所在就停佇頂面。
2:10 𪜶看著彼粒星，非常歡喜。
2:11 𪜶入去厝內，看著細漢囝仔及伊的老母馬利亞，就仆落去拜伊，然後開𪜶的寶盒，將黃金、乳香，及沒藥做禮物獻互伊。
2:12 後來，佇眠夢中上帝指示𪜶毋通倒去希律遐，𪜶就對別條路倒去本國。
逃走去埃及
2:13 星象家離開了後，主的天使佇約瑟的眠夢中對伊出現，講：「起來，導細漢囝仔及伊的老母逃走去埃及，住遐到我講通離開的時，因為希律啲尋此個細漢囝仔，欲給伊刣死。」
2:14 約瑟就起來，導細漢囝仔及伊的老母透暝離開去埃及，
2:15 住佇遐到希律死。這是欲應驗主通過先知所講的話：我有召我的子出埃及。
刣死細漢查甫囝仔
2:16 希律一下知家己互星象家騙去，非常受氣，就差人將伯利恆以及周圍所有的查甫囝仔，照伊對星象家詳細查問的時算起，兩歲以下的攏刣死。
2:17 此個代誌有應驗主通過先知耶利米所講的話：
2:18 佇拉瑪有聽著聲，
啼哭真悲傷；
蕾潔為著伊的子兒啲哭，
毋肯受安慰，因為𪜶攏無去啦。
對埃及倒來
2:19 希律死以後，主的天使佇埃及，佇約瑟的眠夢中對伊出現，
2:20 講：「起來，導細漢囝仔及伊的老母倒去以色列地；因為欲害細漢囝仔的性命許個人已經死。」
2:21 約瑟就起來，導細漢囝仔及伊的老母倒去以色列地。
2:22 約瑟聽見亞基老續接伊的老父希律做猶太的王，毋敢倒去遐；後來佇眠夢中得著指示，就退去加利利境內，
2:23 到一個城叫做拿撒勒，住佇遐。這是欲應驗主通過先知所講的話：伊欲叫做拿撒勒人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。