上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
瑪拉基書
3:1 上主 — 萬軍的統帥講：「我欲差遣我的使者準備我頭前的路；恁啲尋求的主會忽然間來到伊的聖殿。恁所仰望彼位立約的使者啲欲來啦。
3:2 「毋拘伊來的日啥人接載會牢？伊出現的時啥人徛會在？伊親像煉金的人用的火，親像漂布的人用的鹼。
3:3 伊欲來審判，親像人啲提煉純金；伊欲淨化利未的後代，鍛鍊𪜶親像啲鍛鍊金銀，一直到𪜶會當獻合宜的祭物互上主。
3:4 彼時，猶大及耶路撒冷的人民，欲獻上主所歡喜接納的祭物，及古早的年日像款。」
3:5 上主 — 萬軍的統帥講：「我欲徛出來佇恁面前施行審判；我欲趕緊作證控告許個行邪術的、犯姦淫的、濫糝咒誓的、剝削工人的工錢的、欺壓孤兒寡婦的、枉屈出外人的 — 就是所有無敬畏我的人。」
毋通偷提上帝的物
3:6 「因為我是上主，我𣍐改變，所以恁諸個雅各的子孫𣍐滅亡。」
3:7 上主 — 萬軍的統帥講：「對恁祖先的時代開始，恁不時違背我的規例，無啲遵守。今恁著歸向我，我就轉向恁。毋拘恁問：『阮欲按怎歸向你？』
3:8 我問恁：『人偷提上帝的物豈著？恁竟然有人啲偷提我的物！』恁問：『阮按怎給你偷？』恁就是無照規定奉獻十分一及其他的捐獻。
3:9 恁攏會受重的咒詛，因為恁全國攏啲給我偷。」
3:10 上主 — 萬軍的統帥講：「恁著將十分一的奉獻全數提來囥佇庫房，按呢我的聖殿就有夠額的食物。來，來試看我會為著恁開天窗，將福氣摒落來互恁抑𣍐？」
3:11 上主 — 萬軍的統帥閣講：「我欲阻止草蜢毀壞恁土地的出產，欲互園裡的葡萄樹結真多葡萄。」
3:12 上主 — 萬軍的統帥講：「按呢，萬國攏會講恁上有福氣，因為恁的地會互人佇遐安居樂業。」
正直的人及邪惡的人
3:13 上主講：「恁有用忤逆的話激我。恁講：『阮曾用什麼話激你？』
3:14 恁曾講：『侍奉上帝無採工。阮遵守伊的命令，抑是佇上主 — 萬軍的統帥面前哀傷啼哭行來行去，有什麼路用？
3:15 阮看著的是自高的人快樂，做歹的人興旺；𪜶試探上帝嘛免受刑罰。』」
3:16 然後，許個敬畏上主的人互相談論，上主有注意聽。佇伊面前有一本記錄的冊，內面記載許個敬畏上帝尊崇伊名的人。
3:17 上主 — 萬軍的統帥講：「佇我採取行動彼日，𪜶會成做我特別的子民；我會疼惜𪜶，親像父母疼惜許個服事𪜶的子兒。
3:18 彼時，恁會閣一遍看出正直的人及邪惡的人、服事上帝及無服事伊的人的差別。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。