上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒迦利亞書
對耶路撒冷的應允
8:1 上主 — 萬軍的統帥對我講話。
8:2 伊講：「我深深疼惜錫安，熱愛伊，愛甲心狂火熱。」
8:3 上主閣講：「我欲倒來錫安，欲𫢶佇耶路撒冷；耶路撒冷欲稱做忠實的城；上主 — 萬軍的統帥的山欲稱做聖山。」
8:4 上主 — 萬軍的統帥按呢講：「將來耶路撒冷的廣場會閣有長歲壽、攑柺仔的老阿伯、老阿姆佇遐啲坐。
8:5 城內的廣場會閣有真多查甫囝仔及查某囝仔佇遐啲𨑨迌。」
8:6 上主 — 萬軍的統帥按呢講：「到許個日，流亡倒轉來的子民會看這做無可能；我豈嘛會看這做無可能？」
8:7 上主 — 萬軍的統帥閣講：「你看，我欲對日出的所在及日落的所在解救我的子民。
8:8 我欲導𪜶倒轉來住佇耶路撒冷；𪜶欲做我的子民，我欲做𪜶的上帝，用信實及公義對待𪜶。」
8:9 上主 — 萬軍的統帥按呢講：「著堅強！這是恁佇上主 — 萬軍的統帥的聖殿下地基欲重建的時，所聽著先知講的話。
8:10 佇許個日以前，人及牲生攏無人倩，閣因為有對敵，人出入無平安；因為我互人互相敵對。
8:11 毋拘，現在我𣍐閣親像以前按呢對待流亡倒轉來的子民。上主 — 萬軍的統帥按呢宣布。
8:12 𪜶通平安撒種；葡萄樹會結果子，地出土產，天降露水。我欲互流亡倒轉來的人民享受諸個一切。
8:13 猶大家及以色列家啊，以前恁佇列國中互人看做是受咒詛的，現在我欲解救恁，互恁成做受祝福的。毋免驚，著堅強！」
8:14 上主 — 萬軍的統帥按呢講：「恁的列祖惹我受氣的時，我有決意降災禍互𪜶，無改變心意。上主 — 萬軍的統帥講：
8:15 『現在我決意欲施恩互耶路撒冷及猶大家，𣍐改變心意。恁毋免驚。
8:16 恁應該做的是按呢：著互相講真實話；佇法庭審判著照真實公正，促進和睦。
8:17 毋通計謀歹代，互相陷害；毋通咒假誓；因為諸個代誌攏是我所厭惡。』這是上主講的。」
8:18 上主 — 萬軍的統帥對我講話。
8:19 伊講：「四月、五月、七月、十月禁食的日欲成做猶大家歡喜的日子，快樂的節期；所以恁著意愛真實及和平。」
8:20 上主 — 萬軍的統帥按呢講：「將來有列國的人及真多城的住民會來；
8:21 此個城的住民會去給彼個城的人講：『咱緊來去尋上主 — 萬軍的統帥，祈求伊施恩；我嘛欲做夥去。』
8:22 閣會有真多民族及強國來耶路撒冷尋上主 — 萬軍的統帥，求上主施恩。
8:23 上主 — 萬軍的統帥閣講：『佇許個日欲有十個外國人來扭一個猶大人的衫仔裾，講：阮欲及恁做夥去，因為阮有聽著上帝及恁同在。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。