上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒迦利亞書
上主呼召子民歸向伊
1:1 大流士坐位第二年八月，上主對易多的孫，比利加的子先知撒迦利亞講：
1:2 「上主對恁的祖先發大受氣。
1:3 所以你著給人民講：『上主 — 萬軍的統帥按呢吩咐：恁著歸向我，我就轉向恁。』上主 — 萬軍的統帥按呢宣布。
1:4 毋通學恁的祖先。以前的先知曾對𪜶宣布：上主 — 萬軍的統帥按呢講：『著回頭離開恁的歹路及歹行為。』毋拘𪜶毋聽，毋順從我。這是上主講的。
1:5 今恁的祖先佇叨位？許個先知豈會永遠活啲？
1:6 毋拘我吩咐我的僕人眾先知所講的話及規例，已經佇恁祖先的身上實現。後來𪜶回頭，講：『上主 — 萬軍的統帥決定欲照咱的所行所做對待咱。伊已經照按呢做啦。』」
馬的異象
1:7 大流士坐位第二年十一月，就是細罷特月二十四日，上主對易多的孫，比利加的子先知撒迦利亞講話。
1:8 我佇暝時看見一個人騎一隻紅馬，徛佇山谷長青樹的中間；佇伊的後面有紅色、棕色、白色的馬。
1:9 我問伊：「先生，諸個馬啲表示什麼？」
另外一個及我講話的使者給我講：「我欲指示你諸個是什麼意思。」
1:10 彼個徛佇長青樹中間的人應講：「諸個是上主差派來佇地上巡邏的。」
1:11 𪜶就給彼個徛佇長青樹中間上主的使者報告講：「阮有佇地上巡邏，看著全地攏平靜無事。」
1:12 然後上主的使者講：「上主 — 萬軍的統帥，你對耶路撒冷及猶大諸個城受氣已經七十年；你無疼惜𪜶欲閣偌久？」
1:13 上主就用仁慈安慰的話，應及我講話彼個使者。
1:14 及我講話的使者叫我宣告上主 — 萬軍的統帥所講的話：「我深深疼惜耶路撒冷，熱愛錫安。
1:15 毋拘我對安穩自滿的列國非常受氣；因為我曾對我的子民小可受氣，列國煞趁機會加添𪜶的苦難。
1:16 今，我欲倒轉來疼惜耶路撒冷；佇遮我的殿欲重建，城欲重起。」上主 — 萬軍的統帥按呢宣布。
1:17 上主的使者閣叫我宣布：「上主 — 萬軍的統帥講：『我諸個城欲閣繁榮發達；上主欲閣安慰錫安，欲閣揀耶路撒冷做我家己的城。』」
角的異象
1:18 我攑頭看，看見四支角。
1:19 我問及我講話的使者：「諸個角啲表示什麼？」
伊應我講：「諸個是趕散猶大、以色列、耶路撒冷的角。」
1:20 上主閣互我看見四個師傅。
1:21 我問：「諸個師傅來欲做什麼？」
使者應講：「諸個師傅來，是欲嚇驚列國，拍斷𪜶的角，因為𪜶曾用𪜶的角趕散猶大，互人毋敢攑頭。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。