上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哈該書
新聖殿的榮光
2:1 七月二一，上主通過先知哈該傳話，講：
2:2 「今，你著給撒拉鐵的子猶大省長所羅巴伯及約薩達的子大祭司耶書亞，以及所賰的人民講：
2:3 『恁諸個猶活啲的人，什麼人曾看著此個殿古早的榮光？現在恁看著的是什麼款？佇恁的目睭前豈毋是什麼攏無？』
2:4 上主講：『所羅巴伯，著堅強！約薩達的子大祭司耶書亞，著堅強！』上主講：『所有住佇此塊地的人民，著堅強！』上主 — 萬軍的統帥閣講：『著做工！我及恁同在！
2:5 這是根據恁出埃及的時我互恁的應允。我繼續及恁同在。毋免驚！』
2:6 「上主 — 萬軍的統帥按呢講：『閣無偌久，我欲閣一遍互天、地、海，及焦地攏搖泏。』
2:7 上主 — 萬軍的統帥講：『我欲互萬國搖泏，互萬國的財寶運來遮，互此個殿充滿榮光。』
2:8 上主 — 萬軍的統帥講：『銀是我的，金嘛是我的。』
2:9 上主 — 萬軍的統帥閣講：『新起的殿的榮光會超過早前的殿的榮光。佇此個所在，我欲賞賜和平繁榮。』上主 — 萬軍的統帥按呢宣布。」
先知請教祭司
2:10 大流士坐位第二年九月二十四，上主對先知哈該講：
2:11 「上主 — 萬軍的統帥按呢講：『你去見祭司，給𪜶問有關律法的問題。
2:12 若有人用衫仔裾包奉獻歸聖的肉，然後衫仔裾去磕著餅、湯、酒、油，抑是其他食物，彼個食物豈會當算做聖？』」
祭司應講：「𣍐。」
2:13 哈該閣講：「若有人摸著屍體煞無清氣，伊摸著的食物豈會算做無清氣？」
祭司應講：「會，彼個食物算做無清氣。」
2:14 然後哈該講：「上主講：『此個子民，此個國佇我目睭前就是按呢；𪜶的手所做逐項工作，所獻逐項祭物嘛攏無清氣。』」
上主應允賜福
2:15 「今恁著用心檢討，佇上主的殿重建以前，
2:16 恁按怎啲過日？有人去五穀堆，想講會得著二十斗小麥，只有得著十斗；去酒池，想講會得著五十桶酒，只有得著二十桶。
2:17 上主講：『我用火燒風、病害、冰雹給恁處罰，恁猶無悔改。
2:18 對今仔日，九月二四，就是下上主聖殿的地基的日起，恁著用心檢討，著省察。
2:19 倉庫裡猶有種籽無？雖然葡萄樹、無花果樹、石榴樹、橄欖樹攏猶未結果子，毋拘對今仔日起我欲賜福互恁。』」
上主對所羅巴伯的應允
2:20 像彼日，就是九月二四，上主第二遍對哈該講：
2:21 「你去給猶大省長所羅巴伯講：『我啲欲互天及地搖泏，
2:22 推翻列國的勢力，閣終止𪜶的權力，捙倒戰車及駛車的，互馬死兵亡，軍中兄弟互相殘殺。』
2:23 上主 — 萬軍的統帥講：『撒拉鐵的子，我的僕人所羅巴伯，我上主講：佇彼日，我欲用你做我的手指印，因為我有揀選你！』上主 — 萬軍的統帥按呢宣布。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。