上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
哈該書
上主命令重建聖殿
1:1 大流士做波斯皇帝第二年六月初一，上主交代先知哈該傳話互撒拉鐵的子猶大省長所羅巴伯及約薩達的子大祭司耶書亞。
1:2 上主 — 萬軍的統帥按呢講：「諸個人民講上主的聖殿重建的時猶未到。」
1:3 彼時，上主交代先知哈該傳話講：
1:4 「此個聖殿猶荒廢，恁家己豈通住佇裝潢舒適的厝？」
1:5 所以上主 — 萬軍的統帥按呢講：「恁著用心檢討恁的行為。
1:6 恁撒種多，收成少；恁食，毋曾食到飽；恁飲，毋曾飲到止渴；恁穿，毋曾穿到燒；恁賺錢，攏囥落去破孔的錢袋。」
1:7 上主 — 萬軍的統帥按呢講：「著用心檢討恁的行為。
1:8 著𬦰去山頂，取一寡木材，起一間我意愛的殿，互我通顯示我的榮光。上主按呢宣布。
1:9 「恁期待豐收，顛倒收較少；提轉來的，我用風給𪜶吹走。上主 — 萬軍的統帥講：是按怎我欲按呢做？因為我的殿猶荒廢，恁逐個人竟然為著家己的厝啲無閒。
1:10 所以，天無落雨，地無出土產。
1:11 我欲用曠旱互土地、山嶺、五穀、新酒、橄欖油、地的出產物、人類、牲生，以及人勞苦得著的物件，攏受著災害。」
人民聽趁上主的命令
1:12 彼時，撒拉鐵的子所羅巴伯及約薩達的子大祭司耶書亞，以及所賰的子民，攏服從上主 — 𪜶的上帝的話，就是上主差派來的先知哈該的信息。眾人嘛攏敬畏上主。
1:13 然後，上主的使者哈該奉上主差派，對人民傳話講：「上主講：『我及恁同在。』」
1:14 上主有感動撒拉鐵的子猶大省長所羅巴伯，及約薩達的子大祭司耶書亞的心，閣感動攏總所賰的人的心；𪜶攏來重建上主 — 萬軍的統帥、𪜶的上帝的聖殿。
1:15 𪜶佇大流士王第二年六月二十四日開工。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。