上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
阿摩司書
上主的審判
9:1 我看見主徛佇祭壇邊；伊講：「著摃柱的頂座，摃甲基座搖動，互厝頂陷落來，硩著眾人的頭殼；硩無死的，我欲用刀刣死，無一個走會離，連一個都無留啲。
9:2 𪜶若挖孔，鑽入去陰間，我嘛欲對遐給𪜶掠出來；若𬦰上天，我嘛欲對遐給拖落來。
9:3 𪜶若匿佇迦密山頂，我嘛欲給𪜶尋到著，掠出來；若瞞過我的目睭去匿佇海底，我嘛欲命令蛇去咬𪜶。
9:4 𪜶若互對敵掠去，我欲對遐命令刀劍給𪜶刣死。我欲給𪜶顧牢牢，毋是欲保護𪜶，是欲給𪜶刑罰。」
9:5 至高的上主 — 萬軍的統帥一下摸著地，地就消熔；所有住佇地上的攏會哀傷；全地會親像尼羅河漲起來，親像埃及大河的水降低。
9:6 伊佇天頂起伊住的所在，佇地上下穹蒼的地基，叫海水來摒佇地上。伊的稱呼是上主。
9:7 上主講：「以色列人啊，我對待恁豈毋是及對待古實人像款？我豈毋是有導以色列人出埃及，有導非利士人出迦斐託，導敘利亞人出吉珥？
9:8 我 — 至高的上主金金啲看此個有罪的以色列國，欲對地上給伊消滅，毋拘𣍐給雅各的後代攏總剿滅。上主按呢宣布。
9:9 「我欲出命令，給以色列家囥佇篩仔，及萬國做夥篩，連一粒細粒石頭都無欲互伊落去。
9:10 我的子民中間所有有罪的人講：『災禍𣍐趇著阮，𣍐臨到阮。』諸個人攏會死佇刀下。」
以色列的復興
9:11 上主講：「佇彼日，我欲重建大闢倒壞的布棚；我欲修補伊的破隙，欲對荒廢中重新起造，互伊回復早前的情境；
9:12 互以色列會當得著賰落來的以東人，以及所有屬我的國家。」欲成就此個事的上主按呢宣布。
9:13 上主講：
日子欲到，收割的會互犁田的趇著；
踏葡萄的會互種葡萄的趇著；
大山會滴甜酒，小山會流新酒。
9:14 我欲導我受掠的子民以色列倒轉來。
𪜶會重建荒廢的城市，閣住佇遐；
𪜶會栽種葡萄，飲出產的酒；
𪜶會耕作果子園，食出產的果子。
9:15 我欲互𪜶徛起釘根佇家己的土地；
𪜶𣍐閣互人對我賞賜互𪜶的土地拔起來。
上主 — 恁的上帝按呢宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。