上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
阿摩司書
果子的異象
8:1 至高的上主互我看見一個景象：我看見一籃熱天的果子。
8:2 上帝講：「阿摩司，你看見什麼？」
我應講：「我看見一籃熱天的果子。」上主就對我講：「我的子民以色列的結局已經到，我𣍐閣放𪜶煞。」
8:3 至高的上主閣講：「佇彼日，宮殿的歌聲會變做哀哭；逐所在攏是㧒确的身屍，四界恬摺摺。」
上主的刑罰
8:4 恁諸個踐踏散赤人，剿滅困苦人的人，著聽！
8:5 恁講：「初一較緊過，阮通賣五穀；安歇日緊結束，阮通開市買賣，通用細的斗，用無誠實的秤錘，用詭詐的天秤諞人，
8:6 通用銀買散赤人，用一雙鞋換困苦人，將僫的麥仔賣互人。」
8:7 上主針對以色列的驕傲立誓講：「𪜶所做的一切，我永遠記牢牢。
8:8 此個地豈𣍐因為按呢搖泏，住佇遐的人豈𣍐悲哀？此個地會親像尼羅河漲起來，親像埃及的大河漲高降低。」
8:9 至高的上主講：「佇彼日，我欲互日頭佇中晝落山，互地佇日時變烏暗。
8:10 我欲互恁的節慶變做悲哀，歌曲變做哀歌。我欲互恁穿麻衫，頭剃光光；互恁悲傷親像死孤子，最後歸暝歸日攏痛苦。」
8:11 至高的上主閣講：「看咧，日子啲欲到，我欲互飢荒臨到此所在；飢荒毋是因為無物通食，嘴焦毋是無水通飲，是因為無上主的話通聽。
8:12 𪜶闖來闖去，對南到北，對東到西，四界尋上主的話，毋拘尋攏無。
8:13 佇彼日，連媠的少女及勇壯的少年人都會因為嘴焦暈去。
8:14 許個指撒馬利亞的偶像咒誓的人，講『但，你的神明是活的』，抑是講『別是巴的神明有靈聖』的人，𪜶攏會倒落去，永遠𣍐閣起來。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。