上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
會幕
26:1 ( 出 36:8-38 )
「你著用十幅布做會幕；諸個布是用挲過的幼麻，及藍色、紫色、朱紅色的紗織的，頂面著用真幼的手路繡基路伯。
26:2 每幅布長著十二公尺，闊兩公尺；逐幅的寸尺攏像款。
26:3 著將五幅布接做一組；另外五幅嘛著按呢。
26:4 閣佇逐組相接的布，路尾彼幅的邊仔著做藍色的鈕環。
26:5 著佇此組布做五十個鈕環；佇第二組布路尾彼幅的邊仔，嘛做五十個鈕環；兩組的鈕環攏著兩個兩個相對。
26:6 閣著做五十個金鉤仔，用鉤仔將兩組布連做夥，成做一個會幕。」
26:7 「你著用山羊毛織十一幅帳，做蓋會幕的布篷；
26:8 每幅帳長十三公尺，闊兩公尺；十一幅的寸尺攏像款。
26:9 著將五幅帳連做一組，另外六幅嘛連做一組；彼個第六幅的一半著垂落佇布篷的頭前。
26:10 佇逐組相接的帳，路尾彼幅的邊仔著做五十個鈕環。
26:11 閣著做五十個銅的鉤仔，鉤佇鈕環，互布篷連做一個。
26:12 布篷的帳加出來彼半幅，著垂佇會幕的後面。
26:13 蓋會幕的布篷兩旁加出來的五十公分，著垂佇會幕的雙旁。
26:14 「你著用染做紅色的羊的皮蓋布篷，閣用上好的皮蓋佇上頂面。
26:15 「你著用金合歡木做會幕的壁枋。
26:16 壁枋著長四公尺，闊六十六公分。
26:17 逐塊枋著有兩個榫通相接；會幕所有的枋攏著照按呢做。
26:18 南旁的壁枋著做二十塊。
26:19 此二十塊枋的下面，著做四十個銀的座；逐塊枋的下面有兩個孔通鬥𪜶的榫。
26:20 會幕的第二面，就是北旁，嘛著做二十塊壁枋，
26:21 及四十個銀的座；逐塊枋的下面有兩個孔。
26:22 會幕的後面，就是西旁，著做六塊枋。
26:23 會幕後面的角頭，著做兩塊枋，
26:24 下面搋開，頂面相連直到頂面第一個環；兩旁攏是按呢，欲做角頭的路用。
26:25 著有八塊枋，及十六個銀的座；逐塊枋的下面有兩個榫孔。
26:26 「你著用金合歡木做橫楗；南旁及北旁各五支，會幕的後面，就是西旁，嘛五支。
26:27 併於上節
26:28 壁枋對中彼支橫楗，著對此頭迵到彼頭。
26:29 壁枋著用金包啲，閣做金環通套橫楗；橫楗嘛著用金包。
26:30 你著照我佇山頂指示你的款式給會幕搭起來。
26:31 「你著用藍色、紫色、朱紅色的紗，及挲過的幼麻織帳簾；此個帳簾著用真幼的手路繡基路伯。
26:32 你著用金合歡木做四支柱，用金包啲，閣有金鉤仔；柱鬥佇四個有榫孔的銀的座頂面；
26:33 帳簾著吊佇金鉤仔。你著將約櫃扛入帳簾內；此個帳簾是為著恁，將聖所及至聖所隔開。
26:34 閣著將施恩座安佇至聖所內面的約櫃頂面。
26:35 你著將排獻祭的餅的桌下佇帳簾外面的北旁；燈台下佇南旁，及桌相對。
26:36 「你著用藍色、紫色、朱紅色的紗，及挲過的幼麻，用刺繡的手路做會幕的門簾。
26:37 著用金合歡木做五支柱吊門簾；柱著用金包啲；柱的鉤仔著用純金做。閣著為柱鑄五個有榫孔的銅的座。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。