上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
為聖所奉獻
25:1 ( 出 35:4-9 )
上主給摩西講：
25:2 「你著吩咐以色列人奉獻禮物互我；所有甘心奉獻的物，恁攏通收起來。
25:3 下面是恁通對𪜶收的禮物：金、銀、銅、
25:4 藍色紫色朱紅色的紗、幼麻、山羊毛、
25:5 染做紅色的羊的皮、上等的皮、金合歡木、
25:6 點燈的油、製造通抹的聖油及芳香的芳料、
25:7 紅瑪瑙，以及欲鑲佇以弗得及胸袋的寶石。
25:8 𪜶著為我起一個聖的所在，互我通𫢶佇𪜶中間。
25:9 𪜶著照我指示你的款式，起造會幕，製造內面所有的器具。」
約櫃
25:10 ( 出 37:1-9 )
「著用金合歡木做一個櫃，長一百十公分，闊六十六公分，高六十六公分。
25:11 你著用純金包此個櫃，內外攏著包；四邊著鑲金線。
25:12 你著鑄四個金環，安佇伊的四支腳；此旁兩個，彼旁兩個。
25:13 著用金合歡木做兩支槓，用金包啲。
25:14 著將槓穿佇約櫃邊的環裡，用來扛櫃；
25:15 諸個槓著不時穿佇櫃的環裡，毋通抽出來。
25:16 著將我欲賞賜你做見證的石版下佇櫃的內面。
25:17 「著用純金做約櫃的蓋，長一百十公分，闊六十六公分。
25:18 著用金拍兩個天使基路伯，安佇蓋的雙頭，
25:19 一頭一個；雙頭的基路伯，著及蓋連做歸塊。
25:20 兩個基路伯著面相對，向約櫃的蓋；翼搋高，遮約櫃的蓋。
25:21 著將蓋安佇櫃的頂面，閣將我所欲賞賜你的石版下佇櫃內。
25:22 我欲佇遐及你相會，閣欲佇約櫃頂面的蓋，兩個基路伯中間，對你講我欲命令你傳互以色列人所有的事。」
排獻祭的餅的桌
25:23 ( 出 37:10-16 )
「你著用金合歡木做一塊桌，長八十八公分，闊四十四公分，高六十六公分。
25:24 著用純金包此塊桌，四圍鑲金線。
25:25 桌面四個邊各做七點五公分闊的墘，墘的周圍鑲金線。
25:26 你著做四個金環，安佇桌仔四支腳的角頭頂面。
25:27 安環的所在著倚近橫杆，通穿槓來扛桌。
25:28 著用金合歡木做兩支槓，用金包啲，通用來扛桌。
25:29 閣著用純金做貯香料的盤及𥐵仔，以及獻奠酒祭欲用的壺及杯。
25:30 桌頂著有獻祭的餅，排佇我的面前。」
燈台
25:31 ( 出 37:17-24 )
「你著用純金拍一個燈台；燈台的座、中柱、杯、萼、花，攏連做歸座。
25:32 燈台的雙旁著伸出六支枝，一旁三支；
25:33 每一支有三個杯，形狀親像杏花，有萼有花；燈台的六支枝攏是按呢。
25:34 燈台柱有四個杯，形狀親像杏花，有萼及花。
25:35 著佇三對相連的枝下面及柱相接的所在做萼；燈台的六支枝攏是按呢。
25:36 許個萼及枝攏及柱連做一個，攏是用純金拍的。
25:37 著做七個燈盞，點𤏸，互伊相對照光；
25:38 閣著做燈剪及燈盤，攏用純金做。
25:39 著用三十五公斤的純金造燈台及諸個所有的器具。
25:40 你著照我佇山頂指示你的款式，細膩做諸個物件。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。