上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
7:1 但以理看見異象
四隻真大隻的野獸
巴比倫王伯沙撒第一年，但以理啲睏的時夢著一個夢，頭殼內面出現一個異象。伊就給夢的內容寫起來。
7:2 但以理寫講：
我佇暝時看著一個異象：天的四面忽然起大風，擾動大海。
7:3 有四隻形狀攏無仝款的大隻野獸對海裡起來。
7:4 頭一隻親像獅，有鷹鳥的翼。我抵啲看的時，伊的翼互人拔起來，毋拘有人給伊對土腳扶起來，互伊親像人兩支腳徛啲，閣互伊有人的頭腦。
7:5 我閣看著第二隻獸，親像熊，半踞半徛，嘴齒咬三支仔骨，有人大聲給伊講：「起來，肉出在你食。」
7:6 我閣看著一隻獸，親像豹，尻脊骿有四支鳥仔的翼。伊有四個頭，閣有權柄。
7:7 我佇暝時的異象中猶啲看的時，第四隻獸出現；伊看起來真可怕、真恐怖，閣真兇猛。伊有大支鐵的嘴齒，會吞食拆碎；食無了的，就用腳踐踏。伊及頭前彼幾隻野獸無仝款，有十支角。
7:8 我啲觀察許個角的時，忽然對彼中間發一支細支角；此支細支角給彼十支中間的三支，連根都拔起來。此支細支角有親像人的目睭，有講大聲話的嘴。
永遠存在彼位
7:9 我抵啲注意看彼個異象的時，看見有排好勢的寶座，對萬古以前就存在彼位坐佇遐；伊的衫親像雪赫白，頭毛清白親像羊毛。伊的寶座是火焰，寶座的輪仔是炎熱的火。
7:10 有火親像河流對寶座流出來；服事伊的有千千，侍候伊的有萬萬。伊欲開庭審判，案件的冊卷已經拍開。
7:11 因為彼支角啲講大聲話，我就注意觀察，看著第四隻獸互人刣死，身軀毀壞，互人㧒落火燒。
7:12 其他許個獸，𪜶的權勢攏消失，毋拘𪜶猶受允准會當活到所定的期限。
7:13 我閣佇暗時的異象中注意看，看著一個親像人子的對天頂坐雲落來，互人導到對萬古以前就存在彼位的面前，
7:14 領受權柄、榮耀，及王權；逐族、逐邦國，及講逐種語言的人民攏服事伊。伊的權柄永存，𣍐消失；伊的王權一定𣍐受毀壞。
解說異象
7:15 我但以理因為看著的異象心真憂傷、不安，
7:16 就行倚去一個啲侍候的人，問伊關係諸個異象的意思。伊就解說互我知。
7:17 伊講：「彼四隻大隻野獸是啲欲對世界興起的四個王。
7:18 毋拘至高者聖的子民欲得著此個國，世世代代掌理王權。」
7:19 我愛欲閣確實知第四隻獸的意思。伊及彼三隻獸無仝款；伊非常可怕，用鐵的嘴齒吞食、用銅的爪拆碎，閣用腳踐踏食賰的。
7:20 伊的頭有十支角，後來閣發一支角；其中的三支角佇此支角的面前落落來；此支角有目睭，嘴講大聲話；伊的形狀比其他的角閣較可怕。
7:21 我閣看見彼支角及聖的子民交戰，給𪜶拍敗。
7:22 毋拘對萬古以前就存在彼位會來到，替至高者聖的子民申冤。聖的子民得著國度的時間就到。
7:23 彼個啲侍候的人給我講：「第四隻獸是指啲欲對世間興起的第四個國家。伊及其他的國家無仝款，欲吞食，拆碎，併吞全世界。
7:24 彼十支角就是對伊的國會有十個王；後來閣興起一個及以前的王無仝款的王，欲推翻其中三個王。
7:25 伊講話敵對至高者，壓制至高者聖的子民；閣想欲改變節期及律法；聖的子民會交佇伊的手頭，經過一個時期，閣兩個時期，閣半個時期。
7:26 毋拘至高者一下開始審判，此個王的主權欲受剝奪，會永遠受毀壞消滅。
7:27 至高者會將權柄、王權，及天下列國的統治權賜互伊聖的子民。𪜶的國是永遠的國；世界所有國家的統治者攏會服事順服𪜶。」
7:28 此個事到遮為止。我但以理想了真驚惶，面變色。我將此個事囥佇我的心內。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。