上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
尼布甲尼撒第二個夢
4:1 尼布甲尼撒王對全國人民，無論𪜶屬叨一個民族、叨一個邦國、講叨一款語言，給𪜶祝福：
願恁平安富足！
4:2 我樂意將至高上帝對我所做的神跡奇事給恁講。
4:3 伊的神跡非常偉大！
伊的奇事真有氣力！
伊的國度永遠存在！
伊的統治續到萬代！
4:4 我尼布甲尼撒平安住佇我的厝，佇王宮享受榮華富貴。
4:5 我做一個夢互我真驚惶。我佇眠床頂的幻想及頭殼內的異象互我感覺真恐怖。
4:6 我有召集巴比倫所有有智慧的人攏來我遮，愛𪜶給我解夢。
4:7 諸個術士、行法術的、星象家、占卜的進宮，我當面將彼個夢給𪜶講，毋拘𪜶攏𣍐曉給我解說彼個夢的意思。
4:8 最後，我照我的神明的名給伊號做伯提沙撒的但以理來我遮；伊有至聖神明的神佇伊的內面。我將夢給伊講：
4:9 「管理有智慧的人的伯提沙撒，我知你內面有至聖神明的神，無一項奧祕會當給你為難。今請你將我佇眠夢中看著的異象給我解說。
4:10 「我啲睏的時看著的異象是按呢：我看著大地的中央出現一欉非常大欉的樹。
4:11 彼欉樹愈大欉愈粗勇，高甲抵天，天邊海角攏看會著。
4:12 伊枝葉茂盛，果子真多，多甲有夠通做所有動物的食物；田野的走獸來伊的樹影歇睏，飛鳥來歇佇伊的樹椏，所有的生物攏對此欉樹得著食物。
4:13 「我倒佇眠床猶啲看此個異象的時，看著一位聖的守望者對天落來。
4:14 伊大聲喝講：『將彼欉樹剉起來，給樹椏斬斷，給樹葉搖互落了了，給果子撒挕拺，給走獸趕離開樹腳，互飛鳥𣍐當閣來歇佇樹枝。
4:15 毋拘，著給樹頭留佇地裡，用鐵及銅的鍊仔給伊捆𫢶野外青草的中間。
「『著給此個人放佇野外，互露水凍，互伊及野外的走獸仝款食青草；
4:16 互伊的心改變做野獸的心，按呢經過七年久。
4:17 這是彼幾個守望者宣布的裁決，是諸個聖者宣布的決定，欲互世間人攏知，至高者啲掌管此世間的國家；伊欲將國賜互什麼人，就互彼個人；伊會當選立世間上卑微的人治理國家。』」
4:18 尼布甲尼撒王閣講：「這是我做的夢。伯提沙撒，請給我解說此個夢的意思。我的國家所有有智慧的人只有你會當給我解夢，因為你內面有至聖神明的神。」
但以理解夢
4:19 彼陣，叫做伯提沙撒的但以理愣一時仔久；伊想著的代誌互伊真恐惶。王給伊講：「伯提沙撒，你毋免因為彼個夢及伊的意思心艱苦。」
伯提沙撒應王講：「皇上，願此個夢實現佇怨恨你的人，應驗佇你的對敵。
4:20 你看著彼欉大欉樹，伊愈來愈大欉，愈勇，高甲抵天，對天邊海角攏會當看著，
4:21 枝葉茂盛，果子真多，多甲有夠通互所有的動物做食物；田野的走獸攏來歇佇伊的影，飛鳥攏來歇佇伊的枝。
4:22 「皇上，彼欉愈來愈大欉、愈勇的大欉樹就是你。你已經大閣強；你的權力已經淐到天，你統治的範圍已經達到地的盡頭。
4:23 皇上，你所看著對天落來彼個神聖的守望者，伊有講：『給彼欉樹剉起來，給伊毀毀掉，干焦著給樹頭留佇地裡，用鐵及銅的鍊仔給伊捆𫢶野外青草的中間；著給此個人放佇野外，互露水凍，互伊及野外的走獸仝款食青草；按呢經過七年久。』
4:24 「皇上，此個夢會發生佇我的主我的王身上，是出佇至高者的決定。
4:25 你會受趕離開人群，去及野外的走獸做夥住，親像牛食草，互露水凍，按呢經過七年久；直到你承認至高者啲掌管世間的國家，伊欲將國賜互什麼人，就互彼個人。
4:26 關係樹頭著留啲的命令，是欲等你承認，天啲掌管全世界；到彼時，你的國就會閣交互你。
4:27 皇上，求你接受我的苦勸：著秉公行義，離開你的罪；慈悲對待散赤人，脫離你的歹所行，按呢，你就會久長繁榮。」
夢實現
4:28 諸個事攏佇尼布甲尼撒王身上實現。
4:29 一年後，有一日，伊佇巴比倫王宮的厝頂啲散步，
4:30 伊講：「此個大巴比倫的京城豈毋是我用我偉大的才能建造的，會當彰顯我的榮光？」
4:31 話講猶未了，就有一個聲對天傳出來，講：「尼布甲尼撒王，我給你講：『你𣍐當閣作王啦。
4:32 你欲互人趕離開人群，去及野外的走獸做夥住，親像牛食草，按呢經過七年久；直到你承認至高者啲掌管世間的國，伊欲將國賜互什麼人，就互彼個人。』」
4:33 此個事隨時佇尼布甲尼撒身上實現。伊受趕離開人群，親像牛食草，互露水凍；伊的頭毛長甲親像鷹鳥的毛，指甲發甲親像鷹鳥的爪。
尼布甲尼撒頌讚上帝
4:34 「七年到啦，我尼布甲尼撒攑頭向天，我的精神回復正常，就稱讚至高者，謳咾此位尊榮、永遠存在的上帝：
伊的統治永遠存在！
伊的國續到萬代！
4:35 對伊來看，世間人攏是空虛；
佇天頂萬軍及地上住民中間，
伊照伊的旨意做代誌，
無人會當阻擋伊，
抑是質問伊：你啲創啥？
4:36 「彼時，我的精神回復，我的尊嚴及榮光嘛回復，我的國閣再昌盛。參謀及人臣閣來擁護我。我重建我的國，得著比以前閣較大的權柄。
4:37 「今，我尼布甲尼撒欲稱讚，尊崇，將榮光歸互天頂的王，因為伊的所做攏是信實，伊的道路正直；行為驕傲的，伊給𪜶降做卑微。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。