上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
立約的血
24:1 上主對摩西講：「你及亞倫、拿答、亞比戶，以及以色列七十個長老，著上來我遮，對遠遠的所在仆落去拜我。
24:2 只有摩西通就近上主，其他的人毋通倚來，人民嘛毋通及你做夥上山。」
24:3 摩西落山，將上主所有的命令及規例攏講互人民聽；人民齊聲應講：「上主講的話，阮攏欲遵趁。」
24:4 摩西將上主的話攏寫起來。隔日透早，摩西佇山腳起一座祭壇，照以色列十二支族，𫞼十二支石柱。
24:5 伊閣派以色列的少年人去獻燒化祭，嘛獻牛互上主做平安祭。
24:6 摩西將血的一半貯佇盆裡，另外一半灑佇壇頂。
24:7 摩西閣提立約的冊讀互人民聽，人民應講：「上主講的話，阮攏欲遵趁。」
24:8 摩西將盆裡的血灑佇人民的身上，講：「這就是立約的血；此個約是上主照伊的話及恁建立的。」
24:9 摩西、亞倫、拿答、亞比戶，以及以色列七十個長老攏上去山裡。
24:10 𪜶看見以色列的上帝；伊的腳下親像鋪藍寶石，親像天赫呢光亮透明。
24:11 上帝無出手傷害以色列的領袖；𪜶攏看見上帝，佇遐亦食亦飲。
摩西佇西奈山
24:12 上主給摩西講：「你上山來我遮，留𫢶遮，我欲將我所寫，欲教示人民的律法及誡命的石版互你。」
24:13 摩西及伊的助手約書亞就出發；摩西𬦰上上帝的山。
24:14 摩西給許個長老講：「恁𫢶遮等阮，聽候阮倒轉來。亞倫及戶珥有及恁做夥；民眾若有代誌，通去尋𪜶。」
24:15 摩西上山；山有雲蓋啲。
24:16 上主的榮光停佇西奈山；雲遮山六日久。第七日，上主對雲中叫摩西。
24:17 以色列人看見上主的榮光顯現，親像火佇山頂啲𤏸。
24:18 摩西上山入雲中；伊留佇山頂四十暝四十日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。