上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
對聖殿流出泉水
47:1 彼個人導我轉來聖殿門口。我看見有水對聖殿的戶橂下面淐出來，流向東旁，就是聖殿大門的方向。水對聖殿的正旁，經過祭壇的南旁流落來。
47:2 然後，伊閣導我對北門出來，導我對外面踅到東旁的外門。有水對門的南旁流出來。
47:3 彼個人提量尺，對門口向東行，量五百公尺，叫我蹽水過去；水淹到腳目。
47:4 伊閣對遐進前量五百公尺，叫我蹽水過去；水淹到腳頭窩。閣對遐進前量五百公尺，叫我蹽水過去；水淹到腰。
47:5 伊閣對遐進前量五百公尺；水漲起來成做河，無人會當蹽過去，只有會當用泅的。
47:6 伊給我講：「人子啊，你有看見無？」
了後，彼個人導我轉來河邊。
47:7 我轉來的時，看見河的兩旁岸有真多樹。
47:8 伊給我講：「此條河流向東，經過約旦河河谷，進入死海。河水流入死海，會互鹹水變做汫水。
47:9 此條河經過的所在，攏會充滿逐種生物，河裡會有真多魚。此條河互死海的水變汫水；流過的所在，逐項物攏會活。
47:10 佇遐會有真多掠魚的；對隱‧基底到隱‧以革蓮的岸邊會變做曝網的所在。死海的魚類會親像地中海赫呢多。
47:11 毋拘死海附近的濕地及水窟的水無變汫，留啲做鹽。
47:12 此條河的雙旁岸欲有逐種樹木生長，所結的果子通做食物；葉𣍐焦，果子出產𣍐斷，逐個月攏有新的果子，因為對聖殿流出來的水潤澤諸個樹；果子通做食物，葉仔通做藥材。」
地界
47:13 至高的上主按呢講：「恁著將土地分互以色列十二支族；約瑟支族著分兩份。
47:14 我曾對恁的祖先立誓，欲將此塊地賜互𪜶做產業。今，恁承受此塊地，著公平分配土地。
47:15 「北旁的地界是：對地中海向東沿欲去希特倫的路，經過哈馬隘口、西達達、
47:16 比羅他、西伯蓮 (諸個城市佇大馬士革王國及哈馬王國的中間)，到浩蘭王國的哈撒‧哈提干。
47:17 所以，北旁的地界是對地中海到哈薩‧以難城；此個城佇大馬士革的北旁，哈馬的南旁。以上是北旁的地界。
47:18 「東旁的地界是：對大馬士革及浩蘭的交界，沿以色列及基列中間的約旦河續到死海的他瑪。
47:19 「南旁的地界是：對他瑪向西南到米利巴‧加低斯綠洲，閣斡向西北，沿埃及邊界的溪谷到地中海。
47:20 「西旁的地界是地中海，向北到哈馬隘口的對面。
47:21 「恁著照以色列逐支族分此塊地。
47:22 著抽籤分此塊地，互恁家己及佇恁中間寄居生子的外族人做產業。恁著親像對待在地生的以色列人按呢對待𪜶，互𪜶佇恁中間及以色列逐支族仝款得著土地。
47:23 外族人寄居佇叨一支族，就佇彼個支族分著土地。」至高的上主按呢宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。